Qazaqstan dúngenderi qaýymdastyǵynyń basshysy Hýsei Daýrov Qordaida bolǵan oqiǵalar boiynsha málimdeme jasady, dep habarlaidy Sputnik Qazaqstan.
Uiym jetekshisi óziniń Facebook paraqshasynda qazirgi Qordaidyń fotosyn jariialap, kópten kútken qardyń túskenin habarlady. Biraq ulpa qardyń astynda qaiǵyly oqiǵa izderiniń jatqanyn eske saldy. Sol kezde 11 adam qaza bolyp, 200-den astamy jaraqat aldy.
Osy oraida dúngenderdiń basshysy "Kinási joq beibit adamdardy ne úshin óltirdi?", "Quqyqtyq memleket bolyp sanalatyn qazirgi Qazaqstanda ondai múmkin be?", "Shynymen de, buny uly Abai, Shoqan Ýálihanov, Qoja Ahmet Iassaýi, Abylai han, Qasym han, Tóle bi men Qazybek bidiń urpaqtary jasady ma?", "Jeti atasyn biletin ári batyr babalarynyń abyroiyn baǵalaityn, Uly Otan soǵysy kezinde Keńes Odaǵynyń túkpir-túkpirinen evakýatsiialanǵan milliondaǵan adamǵa pana bergen halyqtyń izbasarlary istedi me?",- degen suraqtarǵa jaýap izdeidi.
"Bul halyq kezinde Taiaý Shyǵys pen Kavkazdan deportatsiialanǵan myńdaǵan etnosty baýyryna basqan. Joq!!! Muny istegen qazaqtar emes! Muny ksenofobiia men ultshyldyq urandaryna salynǵan qylmyskerler men qaraqshylar, ońai oljaǵa kóz alartqan tonaýshylar, bizdegi ultaralyq kelisim men turaqtylyqtyń qarsylastary jasady. Olarǵa túrli-tústi tóńkerister tehnologiiasymen sheteldiń emissarlary basshylyq etti. Al qazaqtar bizdi qutqardy!", - dep jazdy Daýrov.
Onyń aitýynsha, Qordaidaǵy jappai tártipsizdikter kezinde qazaqtar dúngen otbasylaryna kómek kórsetip, qaýip-qaterden aman alyp qaldy.
"Qýanysh degen fermer óz úiinde dúngenderdiń birneshe otbasyn jasyrdy. Ainur, Azamat pen Sonia degen dárigerler de týra solai istep, balalary bar birneshe otbasyny qutqardy. Egde jastaǵy bir áiel eki jigitti aman alyp qaldy da, óz úiinde shai berdi. Ondai faktiler kóp", - deidi Daýrov.
Uiym jetekshisi Qordaidaǵy qaqtyǵystyń negizgi sebep-saldaryn anyqtaý qajettigin jetkizdi. Sondai-aq, Daýrov Qazaqstan halqy Assambleiasynyń jumysyn jetildirý kerek dep sanaidy.
Qordaidaǵy oqiǵa
7 aqpanda Qordai aýdanynyń Masanchi aýylynda jappai tóbeles bolyp, onyń sońy tártipsizdikke ulasqan. 8 aqpanda aýdanda tehnogendi sipattaǵy tótenshe jaǵdai rejimi jariialandy.
Zardap shekken 176 adam meditsinalyq kómekke júgingen, 41-i aýrýhanaǵa jatqyzyldy. On adam kóz jumdy. 13 aqpanda eki kún buryn Masanchi aýylynda úiindi astynan bir adamnyń denesi tabylǵany belgili boldy, onyń 7 aqpandaǵy tártipsizdik saldarynan nemese basqa jaǵdaida qaza bolǵanyn saraptama nátijesi boiynsha anyqtalady.
Memleket basshysynyń sheshimimen birqatar sheneýnik pen politsei qyzmetinen ketti. Oblys ákimi aýysty.
