قازاقستان دٷنگەندەرٸ قاۋىمداستىعىنىڭ باسشىسى حۋسەي داۋروۆ قوردايدا بولعان وقيعالار بويىنشا مەلٸمدەمە جاسادى, دەپ حابارلايدى Sputnik قازاقستان.
ۇيىم جەتەكشٸسٸ ٶزٸنٸڭ Facebook پاراقشاسىندا قازٸرگٸ قوردايدىڭ فوتوسىن جارييالاپ, كٶپتەن كٷتكەن قاردىڭ تٷسكەنٸن حابارلادى. بٸراق ۇلپا قاردىڭ استىندا قايعىلى وقيعا ٸزدەرٸنٸڭ جاتقانىن ەسكە سالدى. سول كەزدە 11 ادام قازا بولىپ, 200-دەن استامى جاراقات الدى.
وسى ورايدا دٷنگەندەردٸڭ باسشىسى "كٸنەسٸ جوق بەيبٸت ادامداردى نە ٷشٸن ٶلتٸردٸ?", "قۇقىقتىق مەملەكەت بولىپ سانالاتىن قازٸرگٸ قازاقستاندا ونداي مٷمكٸن بە?", "شىنىمەن دە, بۇنى ۇلى اباي, شوقان ۋەليحانوۆ, قوجا احمەت ياسساۋي, ابىلاي حان, قاسىم حان, تٶلە بي مەن قازىبەك بيدٸڭ ۇرپاقتارى جاسادى ما?", "جەتٸ اتاسىن بٸلەتٸن ەرٸ باتىر بابالارىنىڭ ابىرويىن باعالايتىن, ۇلى وتان سوعىسى كەزٸندە كەڭەس وداعىنىڭ تٷكپٸر-تٷكپٸرٸنەن ەۆاكۋاتسييالانعان ميلليونداعان ادامعا پانا بەرگەن حالىقتىڭ ٸزباسارلارى ٸستەدٸ مە?",- دەگەن سۇراقتارعا جاۋاپ ٸزدەيدٸ.
"بۇل حالىق كەزٸندە تاياۋ شىعىس پەن كاۆكازدان دەپورتاتسييالانعان مىڭداعان ەتنوستى باۋىرىنا باسقان. جوق!!! مۇنى ٸستەگەن قازاقتار ەمەس! مۇنى كسەنوفوبييا مەن ۇلتشىلدىق ۇراندارىنا سالىنعان قىلمىسكەرلەر مەن قاراقشىلار, وڭاي ولجاعا كٶز الارتقان توناۋشىلار, بٸزدەگٸ ۇلتارالىق كەلٸسٸم مەن تۇراقتىلىقتىڭ قارسىلاستارى جاسادى. ولارعا تٷرلٸ-تٷستٸ تٶڭكەرٸستەر تەحنولوگيياسىمەن شەتەلدٸڭ ەميسسارلارى باسشىلىق ەتتٸ. ال قازاقتار بٸزدٸ قۇتقاردى!", - دەپ جازدى داۋروۆ.
ونىڭ ايتۋىنشا, قوردايداعى جاپپاي تەرتٸپسٸزدٸكتەر كەزٸندە قازاقتار دٷنگەن وتباسىلارىنا كٶمەك كٶرسەتٸپ, قاۋٸپ-قاتەردەن امان الىپ قالدى.
"قۋانىش دەگەن فەرمەر ٶز ٷيٸندە دٷنگەندەردٸڭ بٸرنەشە وتباسىن جاسىردى. اينۇر, ازامات پەن سونيا دەگەن دەرٸگەرلەر دە تۋرا سولاي ٸستەپ, بالالارى بار بٸرنەشە وتباسىنى قۇتقاردى. ەگدە جاستاعى بٸر ەيەل ەكٸ جٸگٸتتٸ امان الىپ قالدى دا, ٶز ٷيٸندە شاي بەردٸ. ونداي فاكتٸلەر كٶپ", - دەيدٸ داۋروۆ.
ۇيىم جەتەكشٸسٸ قوردايداعى قاقتىعىستىڭ نەگٸزگٸ سەبەپ-سالدارىن انىقتاۋ قاجەتتٸگٸن جەتكٸزدٸ. سونداي-اق, داۋروۆ قازاقستان حالقى اسسامبلەياسىنىڭ جۇمىسىن جەتٸلدٸرۋ كەرەك دەپ سانايدى.
قوردايداعى وقيعا
7 اقپاندا قورداي اۋدانىنىڭ ماسانچي اۋىلىندا جاپپاي تٶبەلەس بولىپ, ونىڭ سوڭى تەرتٸپسٸزدٸككە ۇلاسقان. 8 اقپاندا اۋداندا تەحنوگەندٸ سيپاتتاعى تٶتەنشە جاعداي رەجيمٸ جارييالاندى.
زارداپ شەككەن 176 ادام مەديتسينالىق كٶمەككە جٷگٸنگەن, 41-ٸ اۋرۋحاناعا جاتقىزىلدى. ون ادام كٶز جۇمدى. 13 اقپاندا ەكٸ كٷن بۇرىن ماسانچي اۋىلىندا ٷيٸندٸ استىنان بٸر ادامنىڭ دەنەسٸ تابىلعانى بەلگٸلٸ بولدى, ونىڭ 7 اقپانداعى تەرتٸپسٸزدٸك سالدارىنان نەمەسە باسقا جاعدايدا قازا بولعانىن ساراپتاما نەتيجەسٸ بويىنشا انىقتالادى.
مەملەكەت باسشىسىنىڭ شەشٸمٸمەن بٸرقاتار شەنەۋنٸك پەن پوليتسەي قىزمەتٸنەن كەتتٸ. وبلىس ەكٸمٸ اۋىستى.
