QR Saýda jáne integratsiia ministrligi saýda komitetiniń tóraǵasy Erjan Qazanbaev Qazaqstanda qant tapshylyǵy bolmaitynyn málimdedi, dep habarlaidy QazAqparat.
«Búginde elimizde qant qorynyń jetkilikti kólemi bar, elimizde bul áleýmettik mańyzy bar azyq-túlik taýaryna tapshylyq joq. Qolda bar qor únemi tolyqtyrylyp otyrady, iaǵni 3 aidan keiin qant qory taýsylyp, qant tapshylyǵy bolady degen aqparat shyndyqqa sáikes kelmeidi», - dedi Qazanbaev ortalyq kommýnikatsiialar qyzmetinde ótken baspasóz máslihatynda.
Sonymen birge, spiker saýda núktelerinde baǵany kóterý faktileri bolǵan jaǵdaida qaida júginýge bolatynyn túsindirdi.
«Saýda núktelerinde baǵany kóterý faktileri anyqtalsa, mynadai keri bailanys arnalaryna habarlasqan jón: jergilikti atqarýshy organdar (ákimdikter), QR Saýda jáne integratsiialar ministrligi Tutynýshylardyń quqyqtaryn qorǵaý komitetiniń «e-Tutynushy» saity, QR SIM Saýda komiteti jáne QR Básekelestikti qorǵaý jáne damytý agenttigi», - dedi Erjan Qazanbaev.
Buǵan deiin ol Qazaqstanda áleýmettik mańyzy bar azyq-túlik taýarlary 0,6%-ǵa qymbattaǵanyn aitqan edi.
Óńirlerde bir apta ishinde baǵanyń eń joǵary ósýi Mańǵystaý oblysynda, Qostanai jáne Qyzylorda oblystarynda tirkelgen.
Aita keteiik, Qazaqstanda shamamen 90 myń tonna qant qory bar jáne respýblika qantpen tolyq qamtamasyz etilgen.
