Foto: Májilis baspasóz qyzmeti
Qazaqstan Respýblikasy Bas prokýratýrasynyń Aktivterdi qaitarý jónindegi komiteti endi investorlar quqyǵyn qorǵaý komiteti dep atalady. Bul týraly Prezident Qasym-Jomart Toqaev búgin ótken Qazaqstan halqyna Joldaýynda aitty. Osy rette Ult.kz tilshisi urlanǵan aktivterdi qaitarý boiynsha depýtattyq saýal joldap, Májilis qabyrǵasynda osy máseleni jii kóterip júrgen depýtat Ermurat Bapidan komitettiń ózgerýine bailanysty surady.
«Bir dúdámal oida qaldym. Prezidenttiń ózi 1 trln-ǵa jýyq teńgeniń qaitqanyna kóńili toq peiil syndy oi aitty. Prezident qazir memlekettik saiasatty ustanyp otyrǵandyqtan investitsiialyq komitetke aýystyrý jónindegi sheshimi qanshalyqty zerttelgen, negizdelgen ekenin bilmeitmin, biraq men aktivterdi qaitarý jóninde Komitettiń Bolǵanyn qalar edim. Biz endi Prezidenttiń osy sózinen keiin aktivterdi qaitarý máselesiniń mańyzy memleket deńgeiinde túsip qaldy ma dep oilaimyn. Bul ókinishti jaǵdai», ‒ dedi Májilis depýtaty E. Bapi.
Aita keteiik, Prezident Joldaýda «elimizde birde-bir mekemeniń ataýynda investitsiia degen sóz joq, investitsiia tipti jetim bala siiaqty úsh-tórt mekemege ortaq másele bolyp, óz jolyn tappai júr» dep, 10 kún ishinde Premer-ministr naqty usynys berýge tiis ekenin aitty.
«Meniń oiymsha, Qazaqstan Respýblikasy Bas prokýratýrasynyń Aktivterdi qaitarý jónindegi komitetin Investorlar quqyǵyn qorǵaý komiteti dep ataýdyń ýaqyty keldi. Bas prokýratýra zańsyz aktivterdiń ielerimen jaqsy jumys istegenin atap ótken jón. Qazynaǵa 850 mlrd teńgege jýyq qaitaryldy. Osy qarajat 10 mektep pen tórt sporttyq nysandy salýǵa, 235 densaýlyq saqtaý nysany men 177 sý infraqurylymy nysanynyń qurylysyna jáne jańǵyrtýǵa baǵyttaldy. Respýblikalyq biýdjetke taǵy da qosymsha qarajat túsetini eskerilgen», — dedi Prezident.
