Kóliktegi bas memlekettik sanitarlyq dáriger Sádýaqas Baiǵabylov COVID-19 juqtyryp alyp, Dýbaidan kelgen jolaýshynyń ishki áýe reisine jiberilmegenin málim etti, dep habarlaidy "Ult aqparat".
Qazirgi ýaqytta sanitarlyq-karantindi postarda epidemiologtar PTR-test anyqtamasynyń bar-joǵyn jiti tekserip jatyr.
«2020 jyldyń 13 qarashasynda Nur-Sultanǵa Dýbaidan 129 jolaýshy ushyp keldi. Onyń ishinde 125 adam PTR-test anyqtamasy bolǵanymen, 4-i anyqtamasyz keldi. PTR-test anyqtamasy joq Qazaqstan azamattary tártip boiynsha tranzitpen ishki reisterge otyrý úshin PTR-testen ótý úshin karantinge jatqyzyldy. 13 qarashada Nur-Sultan áýejaiyna Qazaqstan azamaty kelip, tranzitpen Almatyǵa ushpaq bolǵan. PTR-analizden ótkeni týraly anyqtamany ótkizgen. Epidemiologtar atalmysh anyqtamany tekserý barysynda qorytyndyda COVID-19 boiynsha oń (positive) nátije dep kórsetip turǵanyn kórdi. Osylaisha koronavirýs juqtyrǵan áiel jolynan qalyp, elordadaǵy karantindik statsionarǵa jatqyzyldy», - dedi Sádýaqas Baiǵabylov.
Koronavirýs juqtyrǵan áiel Dýbaidan ushyp kelgen soń 20 minýttan keiin Almatyǵa baǵyt alǵan ushaqqa otyrmaq bolǵan. Alaida epidemiolog jolaýshyǵa sapardy jalǵastyrýǵa ruqsat bermei, ishki reisterdegi jolaýshylardyń aýrý juqtyrý qaýpine tosqaýyl qoiǵan.
Qazirgi tańda halyqaralyq áýe reisterimen Qazaqstanǵa koronavirýs juqtyryp ákelýdiń 54 jaǵdaiy tirkelgen. Atap aitqanda Nur-Sultanǵa koronavirýs juqtyrǵan 12, Almatyǵa 40, Shymkentke 2 adam shetelden ushyp kelgen.
