كٶلٸكتەگٸ باس مەملەكەتتٸك سانيتارلىق دەرٸگەر سەدۋاقاس بايعابىلوۆ COVID-19 جۇقتىرىپ الىپ, دۋبايدان كەلگەن جولاۋشىنىڭ ٸشكٸ ەۋە رەيسٸنە جٸبەرٸلمەگەنٸن مەلٸم ەتتٸ, دەپ حابارلايدى "ۇلت اقپارات".
قازٸرگٸ ۋاقىتتا سانيتارلىق-كارانتيندٸ پوستاردا ەپيدەميولوگتار پتر-تەست انىقتاماسىنىڭ بار-جوعىن جٸتٸ تەكسەرٸپ جاتىر.
«2020 جىلدىڭ 13 قاراشاسىندا نۇر-سۇلتانعا دۋبايدان 129 جولاۋشى ۇشىپ كەلدٸ. ونىڭ ٸشٸندە 125 ادام پتر-تەست انىقتاماسى بولعانىمەن, 4-ٸ انىقتاماسىز كەلدٸ. پتر-تەست انىقتاماسى جوق قازاقستان ازاماتتارى تەرتٸپ بويىنشا ترانزيتپەن ٸشكٸ رەيستەرگە وتىرۋ ٷشٸن پتر-تەستەن ٶتۋ ٷشٸن كارانتينگە جاتقىزىلدى. 13 قاراشادا نۇر-سۇلتان ەۋەجايىنا قازاقستان ازاماتى كەلٸپ, ترانزيتپەن الماتىعا ۇشپاق بولعان. پتر-اناليزدەن ٶتكەنٸ تۋرالى انىقتامانى ٶتكٸزگەن. ەپيدەميولوگتار اتالمىش انىقتامانى تەكسەرۋ بارىسىندا قورىتىندىدا COVID-19 بويىنشا وڭ (positive) نەتيجە دەپ كٶرسەتٸپ تۇرعانىن كٶردٸ. وسىلايشا كوروناۆيرۋس جۇقتىرعان ەيەل جولىنان قالىپ, ەلورداداعى كارانتيندٸك ستاتسيونارعا جاتقىزىلدى», - دەدٸ سەدۋاقاس بايعابىلوۆ.
كوروناۆيرۋس جۇقتىرعان ەيەل دۋبايدان ۇشىپ كەلگەن سوڭ 20 مينۋتتان كەيٸن الماتىعا باعىت العان ۇشاققا وتىرماق بولعان. الايدا ەپيدەميولوگ جولاۋشىعا ساپاردى جالعاستىرۋعا رۇقسات بەرمەي, ٸشكٸ رەيستەردەگٸ جولاۋشىلاردىڭ اۋرۋ جۇقتىرۋ قاۋپٸنە توسقاۋىل قويعان.
قازٸرگٸ تاڭدا حالىقارالىق ەۋە رەيستەرٸمەن قازاقستانعا كوروناۆيرۋس جۇقتىرىپ ەكەلۋدٸڭ 54 جاعدايى تٸركەلگەن. اتاپ ايتقاندا نۇر-سۇلتانعا كوروناۆيرۋس جۇقتىرعان 12, الماتىعا 40, شىمكەنتكە 2 ادام شەتەلدەن ۇشىپ كەلگەن.
