Búgin Dýbaidaǵy EXPO 2020 Dubai Dúniejúzilik kórmesindegi Qazaqstan Respýblikasynyń Ulttyq pavilony millionynshy kelýshini qarsy aldy. Bul týraly QazAqparat «QazExpoCongress» UK» AQ-nyń baspasóz qyzmetine silteme jasap habarlaidy.
Qazaqstan pavilonynan kelgen 1 millionynshy qonaq Dýbai qalasynyń 38 jastaǵy turǵyny, kásipker Mahmýd Ál Býrai boldy. Oǵan Qazaqstanǵa tegin saparlaýǵa eki adamǵa arnalǵan sertifikat berildi. Áýe biletterin Air Astana usynsa, týrdy «Kazakh Tourism» Ulttyq kompaniiasy uiymdastyryp otyr.
Mahmýd Ál Býraidyń aitýynsha, ol Qazaqstanda buryn-sońdy bolmaǵan. Sondyqtan bizdiń elge kelý múmkindigin jiberip almaýǵa tyrysatynyn jetkizdi.
«Dostarym maǵan Qazaqstan pavilonyna barýǵa keńes berdi. Olar onyń EXPO-daǵy eń úzdik pavilondardyń biri ekenin aitty. Men Qazaqstanda eshqashan bolǵan emespin, sodan bolar pavilonnyń mazmunynan úlken áser aldym. Maǵan ásirese robot qolmen usynylǵan qoiylym unady, ol óte emotsionaldy jáne keremet. Al pavilon aldynda óner kórsetken ulttyq orkestr tamasha týyndylardy oryndaýymen tánti etti. Men elderińizge baryp, saiahat jasaitynyma óte qýanyshtymyn», - dedi Ál Býrai.
Millionynshy qonaqty Qazaqstan Respýblikasy Premer-Ministriniń orynbasary - Saýda jáne integratsiia ministri Baqyt Sultanov, Qazaqstan Respýblikasynyń BAÁ-degi Tótenshe jáne ókiletti elshisi Madiiar Meńilbekov, EXPO 2020 Dubai kórmesi tóraǵasynyń halyqaralyq qatysýshylar jónindegi orynbasary Omar Shehade, EXPO 2020 Dubai-daǵy Qazaqstan Respýblikasynyń Ulttyq sektsiiasynyń bas komissary Allen Sháijúnisov quttyqtady.
Esterińizge sala keteiik, EXPO 2020 Dúniejúzilik kórmesi Dýbaida 2021 jyldyń 1 qazany men 2022 jyldyń 31 naýryzy aralyǵynda ótedi jáne ol Taiaý Shyǵystaǵy alǵashqy EXPO kórmesi. Kórmeniń taqyryby – «Aqyl-oidy biriktirip, bolashaqty qurý». EXPO 2020 Dubai uiymdastyrý komitetiniń málimeti boiynsha, 15 aqpandaǵy esep boiynsha kórmeni 13,5 mln adam tamashalaǵan. Al Ulttyq pavilonǵa kúnine orta eseppen 8 myń adam keledi.
Atalmysh kórmede Qazaqstan pavilony «Álem beinesi» art-jobasymen Ginnestiń rekordtar kitabyna engenin jazǵan bolatynbyz.
«Álem beinesi» kartinasyna pavilonǵa álemniń túkpir-túkpirinen kelgen adamdar qylqalam jáne boiaýlardyń kómegimen óz qoltańbasyn qaldyrǵan. Keneptiń ólshemi planetamyzdyń kishireitilgen fizikalyq parametrleriniń uzyndyǵy men enine sáikes keledi.
