Qaraǵandyda "Drevnii Rim" meiramhanasyndaǵy tóbeleske qatysty dep kúdikke ilingen Narek Gýrýrian Qazaqstanǵa ekstraditsiialandy. 1 qańtarǵa qaraǵan túni bolǵan tóbeles kezinde bir adam ólip, on adam jaralanǵan. Jergilikti politsiia departamenti Azattyqqa Gýrýriannyń ekstraditsiialanǵanyn rastady.
"Kúdikti Gýrýrian Reseiden ekstraditsiialandy. Qalǵan suraqtar sotqa deiingi tergeý deregi bolǵandyqtan aitylmaidy" dep habarlady politsiia ókilderi.
Buǵan deiin tóbeles boiynsha sotta suralǵan tergeýshi Karpikov Gýrýriannyń isi jeke óndiriske shyǵaryldy dep aitqan. Aiyptaý tarabynyń dereginshe, tóbeles kezinde eki adam pyshaq urǵan: sottalýshy Iýsif Nýrýlý úsh adamdy jaralaǵan, al kúdikti Narek Gýrýrian eki adamdy pyshaqtaǵan.
2019 jyly 7 qańtarda Gýrýrian Qazaqstannan ketip, oǵan halyqaralyq izdeý jariialanǵannan keiin internette onyń videomálimdemesi paida bolǵan. Onda ol tóbeleske qatysqanyn moiyndaǵanmen eshkimdi óltirmegenin jáne "ózgeniń kinásin moinyna artqysy kelmeitinin" aitqan. Ol sonymen birge biliktiń qolyna berilýge daiyn ekenin, biraq jeke qaýipsizdigin qamatasyz etip, tergeýdi ádil ári ashyq júrgizýdi suraǵan. Keiinirek ishki ister ministrligi Gýrýriannyń Reseidiń Omby qalasynda ustalǵanyn habarlady. Alaida ony Qazaqstanǵa ekstraditsiialaý máselesi uzaq ýaqyt sheshilgendikten sot protsesi Gýrýriansyz ótti. Buǵan jábirlenýshi tarap ta, sottalýshy jaq ta narazy boldy.
Bul is boiynsha aiyptalýshylardyń keibiri taǵylǵan aiypty moiyndady, keibiri aiyptarmen tolyq kelispedi. Aiyptaý jaǵymen kelispegen basty aiyptalýshy Iýsif Nýrýlýny sot 19 jylǵa sottady. Arman Ogannisian, Bolat Jumamratov, Tigran Stepanian jáne Ilia Shýrok úsh jylǵa bas bostandyǵynan airyldy. Sot jappai tóbeleske qatysty dep aiyptalǵan alty adam - Hachatýr Ogannisian, David Galkin, Qaiyr Nádirbekov, Torgom Malhasian, Jasýr Pirov jáne Vasif Nýrýlýdyń bas bostandyǵyn tórt jylǵa shektedi. Sýdia Armen Hachatrian jáne Sohak Malhasiandy qylmystyq jaýapkershilikten bosatty, sebebi sot kezinde olardyń tóbeleske qatyspaǵany anyqtalǵan. Sot úkimin árkim árqalai baǵalady. Tóbeles kezinde qaza tapqan Raqymjan Janseiittiń ákesi keibir sottalýshylarǵa kóbirek jyl berilýi kerek edi dep sanaidy. Iýsif Nýrýlýdyń sheshesi Janseiittiń basqa adamnyń qolynan qaza tapqanyn aityp, biraq ulynyń qaýipsizdigine bailanysty kináliniń atyn atai almaitynyn jetkizgen. Jábirlenýshi tarap úkimdi apelliatsiiaǵa berdi.
Sot 13 sottalýshynyń tórteýin - Armeniianyń úsh azamaty men Ózbekstannyń bir azamatyn jazasyn ótegennen keiin Qazaqstan aýmaǵynan shyǵarýdy buiyrdy. Olardyń bes jylǵa deiin Qazaqstanǵa kelýine tyiym salyndy.
"Drevnii Rim" meiramhanasyndaǵy tóbeles qoǵamda narazylyqty kúsheitken. Qaraǵandyda jurt narazylyqqa shyǵyp, kinálilerdi qatań jazalaýdy suraǵan. Internet pen jelide armiandardyń tóbeleske qatysqany jaily aqparat taraǵan. Qazaqstan men Armeniia biligi bul turmystyq tóbeles ekenin, oǵan ultaralyq sipat berýge bolmaitynyn málimdegen.
