Atyraý oblysynyń ákimi Mahambet Dosmuhambetov kóshpeli qumnan qutyla almai otyrǵan aýyldardyń máselesin sheshý jolyn usyndy, dep habarlaidy Sputnik Qazaqstan.
Ortalyq kommýnikatsiialar qyzmetinde ótken onlain brifingte halyq tarapynan qum qursaýynda otyrǵan aýyldarǵa qatysty suraq qoiyldy.
"Qurmanǵazy aýdanyna qarasy Úshtaǵan aýylynyń shetki úilerin qum basyp jatyr. Aýyl halqy alańdap otyr. Bul problemany bilmeitin shyǵarsyz. Óitkeni Azǵyr óńiri - oblystyń eń shalǵai tusy ári joly nashar. Osy máseleni anyqtap, sheshý joldaryn qarastyrasyz ba?", – dedi Aian Shaiahmetov.
Oblys basshysy ol problema jaiynda biletinin aitty. Jaqynda dál osy aýdanǵa issaparmen baryp kelgen.
"Men ol problemany bilmeidi emes, bilemin. Nege deseńiz, bir ai buryn Qurmanǵazy aýdanyna baryp, Azǵyr óńirin araladym, aýyldardyń jaǵdaiymen tanystym. Sol kezde Úshtaǵan aýylynda da boldym. Shynymen de, problema bar. Qum aýyldy qorshap aldy. Shetki úilerdi búgin baspasa da, kelesi jyly basýy múmkin", – dedi Dosmuhambetov.
Ákimniń aitýynsha, buryn basqa aýyldarda osyndai jaǵdaida sekseýil egip, kóshpeli qumdy toqtatatyn.
"Sondyqtan oǵan qatysty jobalyq-smetalyq qujattar jasalýy kerek. Aqshasyn bólip, sekseýil egý kerek. Sóitip, osy máseleni sheshetin oiymyz bar. Endi, ol tek Úshtaǵannyń máselesi ǵana emes. Shalǵai jatqan basqa da aýyldar bar", – dep atap kórsetti Dosmuhambetov.
Oblys basshysy úkimetpen qarjy bólý máselesin talqylap jatqanyn jetkizdi. Oǵan shalǵai aýyldarǵa baratyn joldy jóndeýge bolady. Qarajat bólinse, jumys bastalady.
