Elimizdiń bas transplantologi donor bolýǵa daiyn. Bul týraly ol Aqtóbede ótken baspasóz máslihatynda málimdedi, dep habarlaidy QazAqparat tilshisi.
Donor bolýdyń mán-jaiyn túsindirgen Ulttyq transplantologiia ortalyǵynyń direktory Jaqsylyq Dosqaliev donor bolý men odan bas tartý jaiyn aityp berdi. Halyq densaýlyǵy jáne densaýlyq saqtaý júiesi kodeksine sáikes kez kelgen adam meken jaiy boiynsha tirkelgen emhanaǵa baryp, donor bolýǵa ótinish jaza alady. Keiin arnaiy meditsinalyq tekserýden ótip, donor bolýǵa jaramdy nemese jaramsyz degen qorytyndy shyǵarylady. Eger jaramdy bolsa tirkeýge alynady. Bul túbegeili sheshim emes. Kez kelgen adam bul oiynan bas tartyp, emhanaǵa baryp, qaita aryz jazady. Ol kezde adamnyń miy ólgen jaǵdaida dárigerler naýqasqa qol tigize almaidy. Eger eshqandai qujat bolmasa, dárigerler týǵan-týystarynyń, tanystarynyń kelisimin kútpei adamnyń aǵzasyn ala alady.
«Midyń óli nemese tiri ekenin anyqtaityn arnaiy apparat bar. Midyń ólgenin anyqtaityn arnaiy ádis bar. Bul jerde jemqorlyqtyń bolýy múmkin emes. Ári sheshimdi bir emes, birneshe dáriger shyǵarady. 24 saǵat boiy naýqasty baqylaimyz, keiin sheshim shyǵarylady. Kez kelgen adam donor bola almaidy. Ony qarapaiym halyqqa túsindirý kerek. Birneshe tekserý júrgizilip, gistologiialyq sáikestigi anyqtalady. Adamnyń aǵzasy kóliktiń qajetti bólshekteri siiaqty emes. Egizderdiń de aǵzalary bir-birine sai kelmei jatady. Men qujatqa qol qoidym. Men búgin ólsem de, barlyq jerdegi aǵzamdy beremin. Ózimniń emhanama baryp, sol jerde qujatymdy toltyrdym», - dedi Jaqsylyq Dosqaliev.
Aita keteiik, Aqtóbedegi ruqsatsyz búirek aýystyrý oqiǵasynan soń oblystyq densaýlyq saqtaý basqarmasy jergilikti emhanalarda túsindirý jumystaryn júrgizýge ýáde berdi. Buǵan deiin habarlaǵanymyzdai, Ulttyq transplantologiia ortalyǵynyń direktory Jaqsylyq Dosqaliev Aqtóbege kelip, Serikbolsyn Kósherbaidyń otbasyna kóńil aitýǵa ýáde etti.
