Memleket basshysy Ulttyq bank tóraǵasy Erbolat Dosaevty qabyldady, dep habarlaidy Aqorda.
Memleket basshysyna biylǵy qańtar-mamyr ailaryndaǵy aqsha-nesie saiasatyn júzege asyrýdyń aldyn ala qorytyndylary jáne álemdegi iskerlik belsendiliktiń qalpyna kelýi jóninde, infliatsiianyń ósýi men infliatsiialyq boljamdar aiasynda ortalyq bankterdiń beitarap aqsha-nesie saiasatyna kóshýi týraly baiandaldy.
Prezidentke el ekonomikasy ósiminiń oń baǵyt alýy jáne onyń biylǵy damý perspektivalary, sondai-aq, memlekettik baǵaly qaǵazdar naryǵynda jekelegen investorlar men rezident emes adamdardyń iskerlik belsendiliginiń qaita qalpyna kelýi jaiynda aqparat berildi.
Qasym-Jomart Toqaevqa altyn baǵasynyń ósýine, syrtqy naryqtardaǵy qolaily jaǵdaidyń nátijesinde investitsiialyq kiris pen Ulttyq qorǵa túsken qarjynyń artýyna bailanysty 2016 jylǵy qyrkúiekten beri alǵash ret Qazaqstannyń jalpy halyqaralyq rezerviniń kólemi 95 milliard AQSh dollaryna deiin jetkeni aityldy.
Erbolat Dosaev Memleket basshysyna biylǵy mamyrda infliatsiianyń 7,2 paiyzǵa deiin údeý sebepteri jáne Ulttyq banktiń biylǵa arnalǵan negizgi makroekonomikalyq kórsetkishter boiynsha jańartylǵan boljamdary týraly jetkizdi.
Sonymen qatar bank júiesindegi teńgelik salymdardyń ósý úrdisi jáne Ulttyq bank esebinen qarjylandyrylatyn daǵdarysqa qarsy Prezident bastamalarynyń oryndalý barysy týraly málimet berildi.
Kezdesý qorytyndysy boiynsha Qasym-Jomart Toqaev birqatar naqty tapsyrma berdi.
