QR premer-ministriniń orynbasary Erbolat Dosaev ótken jyldaǵy eldiń áleýmettik-ekonomikalyq damýynyń qorytyndylary týraly baiandady, dep habarlaidy Sputnik Qazaqstan tilshisi.
Onyń aqparatynsha, jalpy ishki ónimniń ósimi jyl qorytyndysy boiynsha 4,1 protsentti quraǵan. Bul ósimniń 75%-i shikizattyq emes sektorlar esebinen qamtamasyz etildi.
"Infliatsiia 5,3%-ke deiin tómendedi. Jumyssyzdyq qaýipsiz deńgeide, jyl qorytyndysy boiynsha 4,9 protsentti qurady", — dedi Dosaev úkimettiń keńeitilgen otyrysynda.
Premer-ministrdiń orynbasary prezident jariialaǵan bes bastamanyń iske asyrylý barysyna toqtaldy.
"7-20-25" baǵdarlamasy boiynsha búginde 43,7 milliard teńgege 3 600 kredit berildi. Jalpy 92 milliard teńgege ótinim tústi. 2019 jyldyń 1 qańtarynan bastap jalaqysy 63 myń teńgeden tómen jumysshylardyń salyq júktemesi 10 esege tómendedi. Bul shara 2 millionnan astam azamattyń tabysyna oń áser etti", — dedi ol.
Sondai-aq, ótken jyldyń 1 qyrkúieginen bastap eńbek naryǵynda suranysqa ie mamandyqtar boiynsha bilim granttary 20 myń orynǵa ulǵaityldy.
"Jańa jataqhanalar salý úshin 100 jer ýchaskesi bólindi. Memlekettik-jekemenshik seriktestik aiasynda bilim berý uiymdarymen 12 kelisimshart bekitildi. Biyl stýdentterge 5 myń jańa oryn paidalanýǵa beriledi", — dedi Dosaev baiandamasynda.
Sonymen qatar, 2018 jyly 595 milliard teńgege 14 myńnan astam mikrokredit berilip, nátijesinde 22 myńnan astam adam jumyspen qamtyldy. "Bastaý biznes" jobasy boiynsha 11 myń azamat mikrokredit alyp, óz kásibin ashty.
