Dopty hokkeiden joǵary liga komandalary arasynda búkilreseilik jarysta Oraldyń «Aqjaiyǵy» Pervoýralskide jergilikti «SKA-Sverdlovsk» komandasymen ekinshi oiynyn ótkizdi, dep habarlaidy QazAqparat.
Matchty qarqyndy bastaǵan oraldyqtar sapynan reseilik surmergen Maksim Pahomov qatarynan eki márte mergendik tanytty. Sodan keiin komanda kapitany Maksim Ótebaliev biylǵy maýsymdaǵy alǵashqy golyn soqty. Sosyn M.Pahomov taǵy eki dopty aidyn ieleriniń qaqpasynda týlatyp, esepti 5:0-ge jetkizdi. «SKA-Sverdlovsk» komandasynan Aleksei Borisov 12 metrlik aiyp dobyn dál oryndady – 1:5.
Ekinshi taim bastalǵannan keiin kóp uzamai Dmitrii Chernov pen A.Borisov «Aqjaiyq» qaqpasyn dál kózdedi – 3:5. Degenmen Nurbol Bókeshovtiń pasynan keiin reseilik legioner Sergei Bashaev esepti ulǵaitty – 6:3. Oral dopty hokkeiiniń túlegi Pavel Chebakov ta óz múmkindigin múlt jibergen joq – 7:3. M.Ótebalievtiń pasynan keiin M.Pahomov osy básekedegi besinshi golyn soqty – 8:3. Budan soń Maksim Ótebaliev attasynyń pasyn sátti paidalandy – 9:3. «SKA-Sverdlovsk» sapynan Vitalii Bryzgin qatarynan eki goldyń avtory atandy – 5:9. M.Ótebaliev osy oiyndaǵy úshinshi, tórtinshi jáne besinshi golyn soqty. Qorytyndy esep – 12:5.
Osylaisha tórt matchtan keiin 9 upai jinaǵan «Aqjaiyq» úshinshi topta kósh basyna kóterildi. Ár toptan aldyńǵy úsh orynǵa ie bolǵan komandalar finaldyq saiystarǵa joldama alady.
Nikolai Shavaldinniń shákirtteri kelesi kezdesýlerin 10-11 jeltoqsanda Verhnii Ýfaleide jergilikti «Nikelshikpen» ótkizedi.
