Seisenbi kúni Singapýrde AQSh prezidenti Donald Tramp pen soltústikkoreialyq kóshbasshy Kim Chen Yn iadrolyq qarýsyzdandyrý protsesin bastaityn birlesken kelisimge qol qoidy, dep habarlaidy Renhap.
Tramp Kimmen bolashaqta Vashington men Phenian arasynda qarym-qatynasqa áser etpeitin «ózgeshe bailanys» ornatqanyn málim etti.
«Soltústik Koreiamen qarym-qatynas burynǵydan ózgeshe bolady», - dedi Tramp qujatqa qol qoiý rásiminen keiin.
Óz kezeginde, Kim álemniń úlken ózgeristerge kýá bolatynyn atap ótip, «taraptardyń ótkendi ótken shaqta qaldyrý týraly sheshim qabyldaǵanyn» tilge tiek etti.
AQSh prezidenti iadrolyq qarýsyzdandyrý protsesiniń taiaýda bastalatynyn ýáde etip, Soltústik Koreia kóshbasshysymen qaita kezdesýge úmittenetinin bildirdi. Onyń aitýynsha, kezdesý Aq úide ótýi múmkin. Tramp qujattaǵy aqparattardy aitqan joq, biraq BAQ-qa arnalǵan brifingte egjei-tegjeili habarlaitynyn atap ótti.
Renhap agenttigi atap ótýinshe, AQSh pen Soltústik Koreia arasyndaǵy sammit - shynynda tarihi oqiǵa.
Budan buryn AQSh pen Soltústik Koreianyń Singapýrda Sentos kýrorttyq aralyndaǵy Capella qonaqúiinde shaǵyn jáne keńeitilgen formatta kezdesý ótkizgeni habarlanǵan edi.
Singapýrde 12 maýsymda Sentosa aralyndaǵy Capella qonaq úiinde ótip jatqan kezdesýde eki el basshysy birge túski as ishken. Astan soń eki el basshylary baqta serýendegen. Serýen kezinde Donald Tramp jýrnalister aldynda sóilep, al Kim Chen Yn sóilemegen. Bunyń aldynda Soltústik Koreia lideri kezdesýdi "beibitshilik nyshany" dep ataǵan.
"Rasymen oń ózgerister bar. Menińshe, kútkendegiden de jaqsy kezdesý bolyp jatyr" degen Tramp jýrnalisterge.
