Qasym-Jomart Toqaevtyń atyna AQSh Prezidenti Donald Tramptyń atynan quttyqtaý jedelhaty kelip tústi, dep habarlaidy "Ult aqparat".
AQSh Prezidenti Donald Tramp Memleket basshysy Qasym-Jomart Toqaevty Qazaqstan Prezidenti laýazymyna kiriskenine bir jyl tolýyna orai quttyqtap, jedelhat joldady.
Bul jóninde Prezidenttiń baspasóz hatshysy Berik Ýáli málimet taratty.
«Amerika halqynyń atynan aldaǵy ýaqytta Qazaqstandaǵy beibitshilikti, ósip-órkendeý men qaýipsizdikti odan ári nyǵaitý jolyndaǵy eńbegińizge tolaǵai tabystar tileimin. Sonymen qatar COVID-19 indetiniń taralýyna qarsy qabyldaǵan jedel sharalaryńyzǵa oń baǵa bergim keledi. Pandemiiany toqtatý jáne COVID-19 indetinen keiingi kezeńde ekonomikany qalpyna keltirýde bizdiń birlesken kúsh-jigerimiz mańyzdy bolyp qala bermek» delingen jedelhatta.
Sonymen qatar AQSh Prezidenti Qazaqstanda qolǵa alynǵan reformalardy qoldaitynyn aityp, eki el arasyndaǵy strategiialyq bailanysty odan ári damyta berýge nietti ekenin jetkizgen.
– Sizdiń saiasi jańarýǵa baǵyttalǵan reformalyq, órshil baǵdarlamańyz erekshe maqtaýǵa laiyq. Halyqtyń Úkimetke degen senimin arttyrý, gúldengen jáne serpindi qoǵamnyń negizgi irgetasy sanalatyn bostandyqtardy qorǵaýdy kúsheitý boiynsha alǵa qoiǵan maqsattaryńyzdy Amerika Qurama Shtattary qoldaidy. Biz keńeitilgen strategiialyq áriptestigimizdiń aiasynda osy bastamalardy iske asyrýda árdaiym Sizben seriktes bolýǵa daiynbyz, – dedi Donald Tramp.
Sodai-aq Donald Tramp Qasym-Jomart Toqaevqa zor densaýlyq, sáttilik pen igilik tilegen.
