Búgin - Ulttyq dombyra kúni! Elbasy Nursultan Nazarbaevtyń jarlyǵymen shilde aiynyń alǵashqy jeksenbisi Ulttyq dombyra kúni bolyp bekitildi.
Atalmysh merekege orai dombyra týraly óleńder toptamasyn oqyrman nazaryna usynýdy jón kórdik.
Dombyraǵa qol soqpa
Dombyraǵa qol soqpa,
Shymyrlatyp bir-birlep.
Júregim, soqpa, kel toqta,
Jas keler kózge júr-júrlep.
Qaiǵyly kóńilim qaidaǵy
Burynǵymdy jańǵyrtar.
Qairatty alyp boidaǵy,
Basymdy qaiǵy qańǵyrtar.
Onan da jyly júzińmen
Kel, jarym, qara betime.
Jyly, tátti jaýap ait
Ishtegi qaiǵy dertime.
Ishtegi eski jalyndy
Sóndir jańa qylyqpen.
Sóilesshi jaqsy, jaǵymdy
Mendei kóńili synyqpen.
Synyq kóńilim kóp kesher,
Maida qolmen ustasań.
Kóńilge túrli oi túser,
Ár tereńge nusqasań.
Kúili, kúisiz báigege
Qajydy kóńilim kóp shaýyp.
Kóp qinamai árnege,
Endi semirt, jem taýyp.
Abai
Dombyra
1 óleń
Dombyra, munsha sheshen boldyń nege,
Kúi tolǵan kókiregiń shejire me?
Syr qozǵap ǵasyrlardan jónelesiń,
Saýsaǵym tiip ketse ishegińe.
Aqqýdyń áýenindei úniń bar –aý,
Sararqa samalyndai esken baiaý.
Bóbektei besiginde maýjyraǵan
Tyńdaimyn men otyryp uiqyly –oiaý.
2 óleń
Salqyn kesh ashyp tastap terezeni,
Qolǵa alsań qońyr sazdy dombyrany.
Qyrandai qalyqtatyp qiial seni,
Asqar oi shyńyna bir qondyrady.
Jarq etip ashyldy jumbaq jahan,
Álemi aqyndar men kúishilerdiń.
Ún- tilsiz otyrasyń bolyp ań-tań,
Qupiia syryn ańdap kók pen jerdiń.
Qońyr saz dombyradan eske baiaý
Terbetip, kóteredi seni aqyryn.
Oianyp, kókiregińe keled taiaý
Belgisiz álde qaida jatqan jyryń.
Sol mezet jaiyp tastap janyńdy alǵa,
Keler jyr jolyn tosyp otyra qal.
Tizilip kóz aldyńda jyr týǵanda,
Qulshynyp taǵy qaita dombyrany al.
Qasym Amanjolov
Dombyra
Tart kúiińdi, dombyra!
Tógil, tógil tátgi kúi,
Taý sýyndai syldyra,
Jelpin, jelpin jel soqtyr!
Taýda tuman turmasyn,
Kókte bult ydyra!
Tyńdamaǵan qoimasyn,
Oidy-qyrdy qydyra,
Qulshyna tart, dombyra!
Eki jeli, úsh qazyq,
Toǵyz noqta dombyra,
Oinataiyn on saýsaq,
Qulyndaiyn quldyra.
Bozda-bozda bota kúi,
Qashaǵandy qýdyra,
Qulshyna tart, dombyra!
Eńbek eldiń kúishisi-aý,
Qulaǵymdy qiqýlat,
Kóńilimdi qandyra,
Tátgi-tátti kúige tart
Kórgenińdi kúi qyla,
Qulshyna tart, dombyra!
Eńbek eldiń jyrshysy-aý,
Janymdy bir jadyrat,
Kókeiime qondyra,
Tátti-tátti áńgime ait
Jańa ómirdi jyr qyla,
Shejire, sheshen suńǵyla,-
Qulshyna tart, dombyra!
Iliias Jansúgirov
Taǵy da Dombyra
Sapar – uzaq dep edi,
tez oraldym, taǵy da
tez oralam,
sebebi:
dombyramdy saǵynam.
Úikúshikteý – bilip qoi –
bu zamannyń serisi men jarlysy: –
jańa úilengen jigittei
dombyrasy bar kisi.
Talai ásem qyzdardyń
darymady «qarǵysy»:
qyzǵa qarap qaitedi
dombyrasy bar kisi.
Talai jumbaq kúi sherttim –
sheshý ǵana qalyp tur.
Aqylsyz kóp qulaqty
kesý ǵana qalyp tur.
Dombyra, sen týraly
talai jazdym men myna –
kúidi uqpaǵan kisiler
sózdi uǵa ma, óziń aitshy, dombyra?!
Baqyt jaily tolǵam kóp,
meniń baǵym – dombyra.
Maisańdap kúi shertpese
nege kerek qol myna!
Kúrek ustai bilmesem,
qalam ustai bilmesem –
qaiǵyrmas em,
al, biraq
dombyra ustai bilmesem,
kúidiń mánin, súisinbesem, ár uǵyp,
óler edim, júregim
qasiretten jarylyp!
Jumeken Nájimedenov
Dombyra
Eki ishektiń birin qatty, birin sál-pál kem bura.
Naǵyz qazaq – qazaq emes,
Naǵyz qazaq – Dombyra!
Bilgiń kelse bizdiń jaidy, sodan sura tek qana:
Odan asqan joq shejire, odan asqan joq dana.
Aqiqatty aitqandardyń bári osylai sorlasyn
Dep bir hahan shanaǵyna quiǵan onyń qorǵasyn.
Jalǵan sóilep kórgen emes sonyń ózinde:
Appaq jalyn kúidiń janyn jalap jatqan kezinde.
Qadyr Myrza Áli
