Keiingi eki jylda doktoranttardyń shákirtaqysy 82 myń teńgeden 170 myń teńgege deiin ósken. Biyl qyrkúiek aiynda onyń mólsheri taǵy kóterilmek. Bilim jáne ǵylym ministri Ashat Aimaǵambetov Facebook paraqshasynda osylai dep málim etti, dep habarlaidy QazAqparat.
«Memleket basshysynyń tapsyrmasyna sáikes, joǵary oqý oryndary stýdentteriniń shákirtaqysy ósti. Máselen, sońǵy eki jylda doktoranttardyń shákirtaqysy 82 myńnan 170 myń teńgege deiin ósti. Biyl qyrkúiek aiynda shákirtaqy kólemi taǵy da artady», - degen ministr joǵary oqý ornynda oqý úshin bólinetin memlekettik bilim granttarynyń sany 5000-ǵa artqanyn eske saldy.
Aitýynsha, biyl da grant sany osyndai kólemde artady.
«Grant bólý kezinde «merit based»-ke ǵana emes, «need based»-ke de nazar aýdaramyz. Máselen, alǵash ret kvota boiynsha bilim granttary jalpy sanynyń 5%-y kópbalaly otbasynan shyqqan balalarǵa, 1%-y tolyq emes otbasynan shyqqan balalarǵa bólinedi», - dep jazdy Ashat Aimaǵambetov.
