Parlament Senatynda Dariǵa Nazarbaevanyń tóraǵalyq etýimen «Sybailas jemqorlyqqa qarsy is-qimyl máseleleri boiynsha zańnamany jetildirý» degen taqyrypta dóńgelek ústel ótti, dep habarlaidy Baq.kz.
Memlekettik qyzmet isteri jáne sybailas jemqorlyqqa qarsy is-qimyl agenttigi tóraǵasynyń orynbasary Alik Shpekbaev atqarylǵan ister jaiynda aita kelip, normativtik-quqyqtyq aktilerdiń jobalaryn mindetti túrde sybailas jemqorlyqqa qarsy saraptama jasaýdy jáne aiqyndalǵan sybailas jemqorlyq qaýipteri jónindegi usynystardy mindetti túrde oryndaý institýtyn qalpyna keltirýdi usyndy. Odan basqa, agenttik etikalyq turǵydaǵy tártipsizdikterdiń jekelegen quramyn memlekettik qyzmettiń bedelin túsirý áreketteriniń qataryna jatqyzýdy usynyp otyr.
Dariǵa Nazarbaeva sybailas jemqorlyqpen kúres «elestermen kúreske» ainalyp ketpeýine nazar aýdardy.
«Adamdy jazalaý úshin sheshim qabyldaýda ádepsizdikti qalai ólsheýge bolady? Onda adam taǵdyry, onyń otbasynyń taǵdyry sheshiledi. Bul jerde óte muqiiat bolý kerek», - dedi ol.
Senator sonymen birge sybailas jemqorlyq týraly tártip buzýshylyqtar týraly habarlaǵan azamattarǵa jan-jaqty qoldaý kórsetýdi usyndy.
«Olardy qorǵaýdy jáne laiyqty marapattaýdy qamtamasyz etý qajet», - dep sanaidy senator.
Senattyń baspasóz qyzmeti habarlaǵandai, Nurtai Ábiqaev, Serik Jaqsybekov, Liazzat Kiinov, Rashit Ahmetov, Serik Aqylbai, Sársenbai Eńsegenov óz usynystary men eskertpelerin aitty. Depýtattar Parlament janynan ǵylymi-zertteý institýtyn qurýdy, memlekettik qyzmetshilerdi tańdaý barysyna jan-jaqty nazar aýdarýdy, memlekettik qyzmetshilerge laiyqty eńbekaqy tóleý múmkindigin qarastyrýdy, qoǵamdyq keńester jumystaryn jetildirýdi usyndy.
Dóńgelek ústel sońynda komitet tóraǵasy D.Nazarbaeva: «Bes institýttyq reformany iske asyrý jónindegi Ult josparynda barlyq mańyzdy másele qarastyrylǵan bolatyn. Parlament qajet zańdardy qabyldady, biraq olar jumys istemei otyr, óitkeni biýrokratiia oǵan nazar aýdarmady», - dedi.
