Almatyda Olimpiada chempiony Dmitrii Balandinniń kóliginiń ainasyn urlaǵan adam ustaldy, dep habarlaidy QazAqparat tilshisi.
Qalalyq Politsiia basqarmasynyń habarlaýynsha, kriminaldy politsiiasy basqarmasy men Almaly aýdandyq politsiia basqarmasynyń qyzmetkerleri 33 jastaǵy er adamdy ustaǵan.
Kúdikti buǵan deiin 3 ret osyndai qylmys jasaǵany úshin sottalǵany belgili boldy.
«Ol bir jerde eki ret qylmys jasaǵanyn moiyndady. Qylmystyq is boiynsha aiǵaq zattar kúdiktiniń turatyn mekenjaiynan tabylyp, is materialdaryna tirkeldi», - dedi politsiia departamentinen.
Aita ketý kerek, bul derekter boiynsha is QR QK-niń 188-babymen sotqa deiingi tergeý tizilimine tirkeldi.
Qylmyskerdiń urlyq jasaǵan sáti kóshedegi beinebaqylaý kamerasyna túsip qalǵan.
Politsiia múlik urlyǵyna qatysty qylmysty azaitý maqsatynda adam kóp shoǵyrlanǵan jerlerde jedel-profliaktikalyq is-sharalardy belsendi júrgizip keledi. Sol sharalardyń nátijesinde 4 myń 651 adam ustalyp, 118 qylmystyq toptyń áreketine tosqaýyl qoiyldy.
Avtokólik bólshekterin urlaǵan 403 adamnyń ishinde 37-si aina urlaýmen ainalysyp kelgen. Olardyń 7-i buryn sottalǵan.
Urlanǵan zatty saýdalamaq bolǵan 16 adam isti boldy. Osyndai saýda núktelerinen 51 búiir ainasy, 7 avtomagnitola, 14 tumanǵa qarsy far tabylǵan.
