Foto: RIA Novosti
Janarmaidyń qazirgi baǵasy munai-gaz salasyna investitsiia tartýǵa múmkindik bermei otyr. Bul týraly QR Energetika ministriniń mindetin atqarýshy Bolat Aqsholaqov aitty, dep habarlaidy QazAqparat agenttigi.
«Janarmai tapshylyǵyn boldyrmaý maqsatynda túrli sharalar qabyldandy. Osy oraida janarmaidy temirjol jáne avtokólikpen shyǵarýǵa tyiym salyndy. Resýrs ielerine janarmaidy tikelei janarmai quiý stantsiialaryna satýǵa mindetteitin zańnamalyq normalar qabyldandy. Munaidy jetkizý jáne munai ónimderin satý kezindegi deldaldarǵa tosqaýyl qoiyldy. Budan basqa, byltyr tamyz aiynda tapshylyqty azaitý úshin saralanǵan baǵany jáne limit engizdik. Biraq barlyq shekteýge qaramastan, «kóleńkeli eksport» arqyly otyndy shyǵarý múmkindikteri tabyldy. Osyǵan bailanysty tapshylyqty boldyrmaý úshin shuǵyl túrde qymbat importtyq otyndy satyp alýǵa májbúr bolyp otyrdyq», - dedi Aqsholaqov Ortalyq kommýnikatsiialar qyzmetindegi baspasóz máslihatynda.
Onyń aitýynsha, elimizde qazirgi tómen baǵalar saqtalsa, Qazaqstanda qansha janarmai óndirilse de, barlyq suranysty qamtamasyz etý múmkin bolmaidy.
«Ekinshiden, baǵalar arasyndaǵy aitarlyqtai aiyrmashylyqqa bailanysty kórshi elderge «aǵyn» jalǵasa beredi, onyń kólemi arta túsedi. Eshqandai shekteýler nátije bermeitini anyq. Úshinshiden, janarmai baǵasyndaǵy disproportsiia «kóleńkeli» naryqty nyǵaityp, ulttyq ekonomikaǵa, múddege keri áserin tigizedi. Tórtinshiden, janarmai boiynsha tómen baǵany saqtaý munai-gaz salasyna investitsiia tartýǵa, ony damytýǵa, geologiialyq barlaý jumystaryn júrgizip, resýrstyq bazany tolyqtyrýǵa múmkindik bermei otyr», - dedi ministrdiń mindetin atqarýshy.
Aqsholaqovtyń sózine qaraǵanda, ishki naryqtaǵy janarmai jaǵdaiyn turaqtandyrý úshin Qazaqstannyń kórshi eldermen salystyrǵandaǵy baǵa boiynsha aiyrmashylyqty azaitý qajet.
