Parlament Senatynyń jalpy otyrysynda «Qazaqstan Respýblikasynyń diplomatiialyq qyzmeti týraly» Qazaqstan Zańyna ózgerister men tolyqtyrýlar engizý týraly» zań jobasy qaraldy.
Qujatqa tolyqtyrýlar engizilgendikten, zań jobasy Májiliske qaitaryldy, dep habarlaidy "Ult aqparat".
Zań jobasy 2002 jyly qabyldanǵan QR «Diplomatiialyq qyzmeti týraly» Zańdy jetildirýge baǵyttalǵan. Normalar ministrliktiń quzyreti men qurylymyn, diplomatiia qyzmetkerleri men osy sala ardagerleriniń áleýetin, jumys isteý jáne qarjylandyrý tártibin qamtidy.
«Biz olardy ózekti jáne qajetti dep, basym kópshiligine qoldaý tanyttyq. Sonymen qatar, zań jobasyn talqylaý barysynda Senat depýtattary tarapynan, Májilis maquldaǵan zań jobasyna birqatar usynys pen túzetý engizildi. Olar, «diplomatiialyq qyzmet ardageri» uǵymyn taǵaiyndaý úshin arnaiy ókiletti 15-ten 10 jylǵa tómendetý jáne ol boiynsha arnaiy tólemderdi 2022 jylǵy 1-shi qańtardan bastaý. Bul usynysty Respýblikalyq biýdjet komissiiasy biylǵy 25-shi qańtarynda qoldady. Kelesi, «diplomatiialyq poshtany» diplomatiialyq qyzmetkerlermen olardyń otbasy músheleriniń jeke múddesi úshin qoldaný quqyǵyn zań jobasynan alyp tastaý», - dedi senator Kairat Kojamjarov.
Onyń aitýynsha, 1961 jylǵy «Diplomatiialyq qatynastar týraly» Vena konventsiiasynyń erejelerine sáikes, diplomatiialyq poshtada diplomatiialyq qujattar men resmi paidalanýǵa arnalǵan zattar bolýy qajet. Atalǵan Konventsiiany Qazaqstan Respýblikasy 1993 jyly ratifikatsiialanǵan jáne Negizgi zańymyz mundai halyqaralyq sharttardyń ulttyq zańnamadan basymdyǵyn tanidy.
«Diplomatiialyq poshtaǵa arnalǵan uqsas talap elimizdiń Kedendik kodeksinde bar. Osyǵan bailanysty, bul normany zań jobasynan alyp tastaý usynylady. QR Premer-Ministriniń biylǵy 9-shy aqpandaǵy Qorytyndysynda, Senat depýttarynyń bul túzetýlerine oń baǵa berildi», - dedi Qojamjarov.
Atap aitqanda, qujatta qazaqstandyq diplomattarǵa qyzmetke kirý kezinde qoiylatyn talaptar kúsheitiletin boldy. Qujatta olarǵa memlekettik tilmen qatar shet tilderin bilýi qajettigi kózdelip otyr. Quqyq buzýshylyq jasaǵany úshin diplomatiia salasy qyzmetkerleriniń diplomatiialyq dárejesi tómendetiledi nemese odan aiyrý da qaralady.
Senat tóraǵasy Máýlen Áshimbaev atalǵan zań jobasynyń erekshe mańyzyn atap ótti.
«Qujat elimizdiń diplomatiialyq qyzmetiniń quqyqtyq bazasyn jetildiredi jáne retteidi. Joba sondai-aq diplomatiialyq sala ardagerlerin áleýmettik qoldaýǵa baǵyttalǵan normalardy da qamtidy. Qabyldanǵan Zań elimizdiń diplomatiialyq qyzmetiniń tiimdiligin arttyrýǵa óz úlesin qosady dep úmittenemiz», - dedi Máýlen Áshimbaev.
Depýtattar zań jobasyn qaraý barysynda oǵan birqatar túzetý engizýdi usyndy. Senatorlar, atap aitqanda, «diplomatiialyq qyzmet ardageri» uǵymyn túzetýdi jáne osy sanatqa jatatyn adamdar tobyn qaita qaraýdy usyndy. Sondai-aq diplomatiialyq poshtany elshilikter qyzmetkerleri men olardyń otbasy músheleriniń jeke paidalanýyna arnalǵan zattar men tehnikany jiberýge paidalaný quqyǵyn alyp tastaýdy surady. Zań jobasy Senattyń osy jáne basqa da túzetýlerimen Májiliske qaitaryldy.
