Tótenshe jaǵdai kezindegi shekteýlerge elimizdegi barsha dini uiymdar qoldaý jasady. Bul týraly Aqparat jáne qoǵamdyq damý ministrligi Din isteri komitetiniń tóraǵasy Erjan Núkejanov málim etti, dep habarlaidy QazAqparat.
Memlekettik komissiiasynyń sheshimimen tótenshe jaǵdai rejimi elimizde sáýir aiynyń sońyna deiin sozylǵanyn eske salǵan komitet basshysy: «Sonymen qatar, 3 sáýirde Aqparat jáne qoǵamdyq damý ministri Dáýren Abaev arnaiy brifing ótkizip, osy din salasyndaǵy azamattarǵa, el halqyna, dini birlestikterge ustanymdaryn aitqan bolatyn. Bul ustanymdar boiynsha jalpy dini rásimderdi ótkizý kezinde halyqty kóp jinamaý, sondai-aq turǵyndarǵa aqparatty berip turý úshin onlain formatyn engizý usynylǵan bolatyn. Qýantarlyq jaǵdai, elimizdegi barsha dini uiymdar tarapynan bul usynystar qoldaý taýyp jatyr», - dedi.
Osy oraida ol engizilgen shekteýler ýaqytsha is-sharalar ekenin, iaǵni tótenshe jaǵdai merzimi aiaqtalǵannan keiin, barlyq rásimder burynǵysynsha óz qalpyna oralatynyn eske saldy.
«Biz árbir Qazaqstan azamatynyń ar-ujdanyna, dini senimine úlken qurmetpen qaraimyz. Bul bizdiń jalpy ustanymymyz. Qazirgi jaǵdaida bizdiń azamattardyń densaýlyǵy, qaýipsizdigi birinshi orynda tur, sondyqtan osyndai is-sharalarǵa barýǵa májbúrmiz», - dedi Erjan Núkejanov.
Budan buryn habarlanǵandai, Naýryzbai qajy Taǵanuly biyl elimizde Ramazan aiy 24 sáýir kúni bastalatynyn aitty.
