El bolyp eńse kóterip, ult pen ulystyń basyn qosyp, jóni oń jurt bolýǵa tyrysyp kele jatqanymyzǵa mine, 25 jyldan asty. Azattyqtyń áýelgi jyldarynda halyqtyń jaǵdaiy shalaqursaq keiipte bolsa, búginde buqara jaǵdaiy aýyz toltyryp aitarlyqtai deńgeide.
Tunyǵy taza birligimiz ben yntymaqtastyǵymyzdyń shyrqyn qashyrǵysy keletin, atynan at úrkitin radikaldy dini aǵymdar men toptar qoǵam arasynda júr. Qatarlary kóbeiip órship te bara jatyr edi, abyroi bolǵanda, atqaminer azamattar men bilik ókilderi atalmysh jaǵdaidy der kezinde qolǵa alyp, tiisinshe sheshim qabyldap, ony júzege asyrýǵa kiristi.
Bir ǵana bizdiń oblysymyzdyń ózinde din keleńsizdikterimen Ishki ister departamenti, Ulttyq qaýipsizdik komiteti, Jambyl oblysy ákimdiginiń din isteri basqarmasy men oblystyq prokýratýra ainalysýda, tipti bul baǵytta meshit imamdary da aianyp jatqan joq. Dese de, eski daýdyń daýyly seiiler emes. Teris aǵymǵa bet buryp, dindi fanattyq deńgeide ustanyp, azamattar arasynda alaýyzdyq týǵyzatyn ideologiiany ustanýshylar áli de bar.
Barshaǵa aidan anyq bolyp turǵan aqiqatty ainyǵan dep bósip júrgenderdiń deni jastar, olar din mamandary tarapynan aitylǵan keńes pen aqparattardy joqqa shyǵaryp, teolog dintanýshylardyń bárin bidǵatshy(dinde jańalyq ashýshy), munafyq(ekijúzdi) dep jón-josyqsyz aiyptaýǵa kóshken. Jasyratyny joq, elge ziiany bar kóptegen teris dini aǵymdar islam dininiń negizinde órbip otyr, sebebi, halyq sanynyń negizgi bóligi musylmandar. Jat aǵymnyń jetegindegi jandardyń kóbi zańǵa tolyq baǵynbaidy, zańdy dini birlestik usynǵan baǵytty ustanbaidy, kókirek janarlary kór, qulaǵy biteý, basty maqsattary búlik shyǵarý. Árine, olar ózderiniń ustanymdaryn aqiqatqa balap, talas-tartys jasaǵysy keletindiginen beisana keiipte, ózderiniń áreketterine jaýap bere almaidy.
Syrt beinesi qoǵamǵa jat, tól dástúri men salt-sanasyn shetke ysyryp tastaǵan, kózqarasy belgili bir deńgeide shektelgen, rýhani quldyraýǵa ainalǵan azamattarmen búginde Jambyl oblysy ákimdigi Ońaltý ortalyǵynyń qyzmetkerleri ainalysyp kele jatyr. 2016 jyldyń qazanynda qurylǵan bul Ortalyq jat aǵymnyń jeteginde ketkender jáne sol aǵymnan zardap shekkendermen tikelei, ári, keshendi túrde jumys jasaidy. Sondai aq, mekemeniń enshisine jalpylama aqparattyq-túsindirý sharalaryn júrgizý de kiredi. Desek te, negizgi qyzmet dini kózqarasy burys bar azamattarmen jeke suhbat júrgizý, aǵymyn anyqtap, dástúrli dindi túsindirý. Olardy ózderiniń kóptep shoǵyrlanatyn jerlerinen(óndiris oryndary, meshitter) taýyp, tiisinshe zań sheńberinen aýytqymai suhbat ótkizilip, mekeme inspektorlary tarapynan baqylaýǵa alynady. Ortalyq quramynda dintanýshy, teolog jáne psiholog mamandary bar. Jeke kezdesýler azamattardyń dini kózqarasynyń deńgeiine qarai júieli túrde júrgiziledi. Oblys kólemindegi ár-bir dini burmalanǵandar jáne dininiń mini shyǵyp opyq jegender «Ońaltý ortalyǵynyń» basty nazarynda!
Tektilerden qalǵan teńdessiz salt-sanamyz ben qoinaýy qorǵa bai keń baitaq dalamyz qazirde sol jerdi basyp júrgenderge amanat ekeni anyq. Ejelden kele jatqan dáripteletin dástúrimiz ben ustanatuǵyn ata dinimizdiń murtyn buzbai keleshek urpaqqa qaldyrý da bizdiń mindetimiz. Osyndai uly maqsattarǵa jetý jolynda, el tutastyǵy men ishki birligin saqtap qalý barysynda «Ońaltý ortalyǵynyń» aldaǵy ýaqytta qosar úlesi teńizdeiin telegei bolmaq. Endigi sátte soqpaq joldy tańdadym dep toqpaqqa jaqyn júrgenderdi, ámiri jetse soiyl ustap, sodyrǵa ainalýǵa daiyn turǵandardyń sanasyn sergitip qalypty qoǵam qataryna qaitarý basty paryz!..
Jambyl oblysy ákimdigi
«Ońaltý ortalyǵy» KMM-niń
inspektor–psihologi
B.Tileýhan
