© Sputnik / Vladimir Voronin
Qazaqstannyń adam quqyqtary jónindegi ýákili Elvira Ázimova Atyraý qalasyna baryp, áleýmettik jelide taraǵan málimetti tekserdi, dep habarlaidy Sputnik Qazaqstan.
Buǵan deiin tártip saqshylary "Dinamo" sportzalynda mitingke shyqqan adamdardy azaptaidy degen aqparat taraǵan bolatyn. Atyraýlyqtar áleýmettik jeliler men buqaralyq aqparat quraldary arqyly politseilerdiń qorlyq kósetkenin jáne halyqty soqqyǵa jyqqanyn aitty. Ázimova osy ǵimaratqa baryp qaitty.
"Qazirgi kezde sportzal bos tur. Ol jerde otyrǵandardyń bárin bosatqan, ia bolmasa, tergeý izoliatoryna otyrǵyzdy. Elvira Ázimova tergeý izoliatoryna baryp, qamaýǵa alynǵan adamdarmen de sóilesti. Olardyń ishinde bes adam aryz jazdy. Ombýdsmen osy shaǵymdardy ishki ister ministrligine jáne bas prokýratýraǵa berip jiberdi", - delingen ombdýsmenniń qyzmeti taratqan resmi habarlamada.
Biraq áleýmettik jelide jáne buqaralyq aqparat quraldarynda sportzalǵa qatysty aryz-shaǵymdar áli de jariialanyp jatyr.
"Endi, bul jerde bas prokýratýra barlyq aqparatty tekserip, sportzalda bolǵan adamdar - ustalǵandar, kýágerler men qyzmetkerlerden jaýap alýy kerek. Prokýrorlyq tekseris adamdardyń aryz jazǵanyn kútip otyrmaýǵa tiis. Prokýratýranyń konstitýtsiialyq mindeti bar. Olar Qazaqstan Respýblikasynyń aýmaǵyndaǵy zańdylyqtyń saqtalýyn qadaǵalaidy", - deidi Elvira Ázimova.
Onyń aitýynsha, áleýmettik jelide jáne buqaralyq aqparat quraldarynda jariialanǵan árbir aryz jan-jaqty tekserilýi shart.
Osy oraida adam quqyqtary jónindegi ýákil tergeýshilerge káýlik etýge jáne bas prokýratýra jariialanǵan kezekshi prokýrorlarǵa telefon arqyly habarlasýǵa qoryqpaý qajettigin jetkizdi.
"Eń bastysy, tekseristiń nátijesi boiynsha halyq aldynda esep berilýi kerek", - dep atap kórsetti ombýdsmen.
Qazirgi kezde ishki ister ministrligine jiberilgen bes aryz boiynsha ishki qaýipsizdik qyzmeti tekseristi bastap ketti.
Aita keteri, buǵan deiin bas prokýratýra adam quqyqtaryn buzý boiynsha 91 aryzdyń túskenin málimdedi. Sonyń ishinde azaptaý áreketteri de bar. Búginde 8 aryz boiynsha Qylmystyq kodekstiń 146-baby (azaptaý) boiynsha tergeý sharalary bastaldy.
Osy isterdiń arasynda adam quqyqtary jónindegi ýákildiń atyna jazylǵan 5 shaǵym da bar.
