Din kóshbasshylary senimniń jahandyq daǵdarysyn eńserýge úles qosýlary tiis. Bul týraly búgin elordada ótip jatqan Álemdik jáne dástúrli dinder kóshbasshylarynyń VI sezinde QR Prezidenti Nursultan Nazarbaev aitty, dep habarlaidy QazAqparat tilshisi.
QR Prezidentiniń atap ótýinshe, búginde álem elderiniń negizgi kúsh-jigeri yntymaqtastyqqa emes básekelestikke baǵyttalyp otyr.
«Týrasyn aitsaq, bul múldem qate, túiyqqa tireletin jol. Sondyqtan bizdiń ortaq paryzymyz - progress magistraline oralýǵa járdem kórsetý. Bul jerde baiaýlaýǵa jol joq. Júzdegen myń, millliondaǵan adam týǵan jerlerin tastap ketýge májbúr, san jetpes kópshiligi iz-tússiz joǵalady. Ǵalamshardaǵy bosqyndar sany 65 millionnan asyp jyǵyldy», - dedi Prezident.
Memleket basshysy jyl saiyn tabiǵi apattardyń saldarynan 4 million adam kedeishiliktiń kebin kise, milliondaǵan adam úilerin tastap ketýge májbúr bolatyndyǵyn basa aitty. Tehnologiiadyq damý qarqyndy júrip, jalpy álemdik bailyq arta túskenimen áleýmettik aýyrtpalyq aýqymy da ulǵaia túskenin atap ótti.
«BUU málimetterine sáikes jer shary turǵyndarynyń 14 paiyzy ashtyqta ómir súrýde. Jumyssyzdardyń jalpy sany 190 million adamnan asyp jyǵyldy. Bul kapitalizmniń qunarly topyraǵy retinde áleýmettik teńsizdikti kúsheitýde. Sondyqtan qaýipsizdik pen ádil álem basty másele sanalady. BUU Qaýipsizdik keńesiniń turaqty emes múshesi retinde onyń jumystaryna belsendi qatysa otyryp, Qazaqstan adamzattyń damýyna kedergi keltiretin jahandyq problemalardy sheshý úshin shuǵyl sharalar qabyldaý qajettigin anyq jáne ekiushty oisyz aitty», - dedi Nursultan Nazarbaev.
Bul rette Elbasy álemdik qaýipsizdikke BUU Qaýipsizdik keńesiniń kúsh-jigerimen ǵana qol jetkizýge bolmaityndyǵyn basa atap ótti.
«Búginde barlyǵymyz, onyń ishinde osy zalda otyrǵan dini jáne qoǵam qairatkerleri, saiasatkerler senimniń jahandyq daǵdarysyn eńserýge óz úlesin qosýlary tiis», - dedi Memleket basshysy.
