Áigili otandasymyz Dimash Qudaibergenniń «Be With Me» atty jańa áni búgin tsifrlyq platformalarǵa shyqty, dep habarlaidy "Ult aqparat".
Jańa trektiń kópshilikke qoljetimdi bolatynyn ánshiniń ózi birneshe kún buryn Instagram paraqshasynda jariialaǵan bolatyn.
«Qurmetti dostar, jaqyn arada, naqtyraq aitqanda 2 sáýirde, barlyq tsifrlyq platformalarda ornalasqan Dimash Qudaibergen atty resmi akkaýnttan meniń «Dimash Digital Show» alǵashqy onlain-kontsertimde oryndalǵan «Be With Me» atty ánimdi tyńdai alasyzdar», - dei kelip, óz jankúierlerine alǵys bildirgen.
Dimashnews portalynyń jazýynsha, «Be With Me» ánin Dimashtyń ózi árlegen. Áýeli demonusqasyn nobailap, keiin oǵan Qurmanǵazy atyndaǵy Qazaq memlekettik halyq aspaptary orkestriniń bas dirijeri Abylai Tilepbergenov oinaǵan dombyra partiiasyn qosqyzǵan. Dimash ánderiniń turaqty óńdeýshisi, saýnd-prodiýser Erlan Bekshýrin demojazbanyń mánerin ózgertip, bastapqy qurylymy men bas áýenin saqtai otyryp, qosymsha yrǵaqtar qosypty. Osydan keiin ol Ádiljan Tolyqpaevty shaqyryp, dombyra partiiasyn qaita jazyp shyqqan. Bul tandemge kompozitor Renat Gaisin qosylyp, klavinet pen úrmeli aspaptar partiiasyn kirgizgen. Máskeýlik mýzykant Marsel Hakimov bas partiiasyn qaita jazyp shyǵady.
Dimashtyń daýysyn dybys rejisseri Dastan Merǵaliev jazǵan. Al aqtyq jazba kezinde Dimashqa BEK-vokalister Rasýl Ýsmanov, Djordan Arakelian, Zarina Bojakova qosylǵan.
Osynsha eńbektiń bárin Erlan Bekshýrin DimashAli stýdiiasynda «pisirip», tolyqqandy trekke ainaldyrdy.
Saýnd-prodiýserdiń aitýynsha, án mátinin Djordan Arakelian men Dáýren Shamuratov jazǵan. Djordan negizgi aǵylshynsha mátinde jazsa, Dáýren qazaqsha rep mátinin shyǵardy.
«Be With Me» áni alǵash ret 2021 jylǵy 17 qańtarda amerikandyq TIXR striming platformasyndaǵy «Dimash Digital Show» onlain-kontsertinde shyrqalǵan edi.
Dimash DIGITAL SHOW Dimashtyń koronavirýstyq pandemiia bastalǵannan bergi alǵashqy jahandyq qoiylymy boldy.
