He makes me cry. - This is amazing! - Splendid! - Unbelievably, I am very impressed. - Excellent! Keremet! Tamasha! Tańqalarlyq! Ǵajap! Teńdesi joq! Dimashtyń AQSh-taǵy jeke shyǵarmashylyq keshine barǵan kórermender alǵan áserimen osylai bólisti, dep habarlaidy Habar 24.
AQSh turǵyndary ony «án shyrqaityn sensatsiia» dep ataidy. Rasynda da jer júzinde sirek kezdesetin daýys keńdigi 6 oktavany quraidy. Dimash zamanaýi týyndylardy oryndaǵanda klassikalyq mýzyka mánerin qosady jáne dástúrli qazaq ánderin búkil álemge tanytty.
Djýli Kissis, Ogaio shtatynyń turǵyny:
- Dimash - búkil álemde teńdesi joq dara tulǵa. Ol maǵan aýrýlarǵa tózip, ýaiymnan aiyrylýǵa kómektesedi. Men úshin onyń orny bólek. Men AQSh-taǵy Dimashtyń Feisbýktegi fan-klýbynyń moderatorymyn.
Diana Herd, Lýiziana shtatynyń turǵyny:
- Ol túgel ómirimdi ózgertti. Jasym alpys altyda. Ómirimde alǵash ret fan-klýbqa kirdim. Dimash óziniń tereń ónerimen adamdarǵa úmit beredi. Milliondaǵan ánshi tyńdaǵanmyn, biraq eshqaisysy Dimashqa uqsamaidy. Endi Dimashtyń otany - Qazaqstanǵa barýdy armandap júrmin.
Dimash Niiazov, Niý-Iork politsiiasynyń qyzmetkeri:
-Kesh tamasha ótti, umytylmas áser qaldyrdy. Munda kóp adam keldi, bárimiz ony jaqsy kóremiz. Kontsertke jubaiym Djenifermen birge keldim. Onyń súiikti áni - «Screaming».
Djenifer, Niý-Iork turǵyny:
- Maǵan Dimash daýysy men energetikasy óte unaidy. Kontsert barysynda Dimash halyqpen de aralasýǵa úlgerdi. Kórermender sezimderin jasyrmai, ánderin qosylyp aitty. Osy shoýdy qoiýǵa kásibi horeograftar, qazaqstandyq bishiler men mýzykanttar, operatorlar men stilister qatysty.
Svetlana, Filadelfiia turǵyny:
- «Maǵan «Mahabbat ber maǵan» qazaq áni unaidy. Dimashtyń oń energetikasy bar. Ózi halyqqa ashyq bolǵandyqtan, biz de júregimizdi ashyp, oǵan umtyldyq.
Hanaei, Niý-Iork turǵyny:
-«Dimash – tańqalarlyq ánshi. Men jaqynda ǵana onyń otanyna, Qazaqstanǵa baryp keldim. Keremet el!
Gúljamal Jandalinova, fan-klýb ókili:
- Onyń ánderi adamdy emdeidi. Men Dimash Qudaibergenniń halyqaralyq fan-klýbyna kiremin. Sonda biz onyń mýzykasynyń shipalyq áseri týraly túrli áńgime estip júrmiz. Qazaqstandyq shoý kórermenderdiń tańdaiyn qaqtyrdy. Bul keshke álemniń ár túkpirinen kelgen Dimashtyń myńdaǵan jankúieri úshin naǵyz meiram boldy.
Kentýkki shtatynyń 70 jastaǵy turǵyny Maikl Garrett ataqty ánshimizdi qazaq halqynyń súiikti uly dep atady. Kontsertke biletti qyrkúiek aiynda satyp alǵan aqsaqal Dimashqa syiǵa tartý úshin óz qolymen qobdisha jasapty.
Aita ketsek, buǵan deiin habarlaǵanymyzdai Dimash Qudaibergenniń Niý-Iorktegi kontserti anshlagpen ótti . Onda Dimash «Daididaý» ánin oryndaǵan sátte kórermen oryndarynan turyp, birge shyrqady.
