Foto: gov.kz
Dimashtyń halyqaralyq jobasynyń túsirilimi elimizdiń eń kórikti jerleri – Kaspii men Bozjyrada jalǵasyp jatyr, dep habarlaidy Týrizm jáne sport ministrliginiń baspasóz qyzmeti.
Voice Beyond Horizon mýzykalyq jobasy – Dimash Qudaibergen men Hunan Broadcasting System birlesip júzege asyryp jatqan bastama. Bul joba Qazaqstandy milliondaǵan kórermenge joǵary týristik áleýeti bar el retinde tanytady. Halyqaralyq jobanyń túsirilimi Túrkistan, Mańǵystaý, Almaty jáne Aqmola oblystarynda, sondai-aq Almaty men Astana qalalarynda ótedi. Shoýdyń finaly elordada uiymdastyrylady dep josparlanǵan.
"Dimash Qudaibergen men jobaǵa qatysýshylar Túrkistan oblysynan Aqtaý qalasyna at basyn burdy. Túsirilim aiasynda Kaspii teńiziniń jaǵalaýynda jáne Qazaqstannyń eń áserli tabiǵi muralarynyń biri – Bozjyra shatqalynda óner kórsetý josparlanǵan. Túsirilimge Qytai, Qazaqstan, Qyrǵyzstan, Italiia, Malaiziia jáne Serbiiadan kelgen talantty oryndaýshylar qatysyp jatyr. Qatysýshylardyń kásibi deńgeiin arnaiy shaqyrylǵan halyqaralyq sarapshylar baǵalaidy", – delingen vedomstvo habarlamasynda.
Jobaǵa Týrizm jáne sport ministrligi, Mádeniet jáne aqparat ministrligi, Kazakh Tourism ulttyq kompaniiasy jáne óńirlik ákimdikter qoldaý kórsetip jatyr.
Aita keteiik, biyl Týrizm jáne sport ministrligi 2025–2029 jyldarǵa arnalǵan "Mańǵystaý" týristik aimaǵyn damytý jóninde keshendi jospar ázirledi. Úkimet qaýlysymen qabyldanǵan qujat óńirdi 9 baǵyt boiynsha júieli damytýǵa baǵyttalǵan. Bul jospar týristerdi tartýǵa qolaily jaǵdai jasap, óńirdiń odan ári damýyna qolaily investitsiialyq ahýal qalyptastyrýǵa múmkindik beredi.
