Kúni keshe Dimash Qudaibergenov óz insta paraqshasyna Abaidyń óleń joldaryn jariialaǵan. Eldegi jurt onysyn ánge degen erek kóńili men alabóten mahabbatynyń kórinisi dep uqqan. Al, ánshiniń bul jazbasy ózge ulttyq tyńdarmandaryn sarsańǵa salǵanǵa uqsaidy. Onyń Aspan asty elindegi jankúierleri áp-sátte uly aqynnyń týyndysyn óz tilderine tárjimalap, avtordyń naqty kim ekenin bilýge hám neǵurlym kóp aqpar tabýǵa kirisip ketken. Bul týraly Dimashtyń PR menedjeri, dosy Alpamys Shárimov áleýmettik jelidegi jeke paraqshasynda jariialady, dep habarlaidy Ult.kz tilshisi.
«Keshe keshkisin Dimash Qudaibergenov óz insta paraqshasyna Abaidyń óleń joldaryn jariialaǵan bolatyn. Óziniń kóńil-kúii, ia unatqandyqtan bolar, áiteýir jariialady! Ne degen qudiret deseńizshi?! Fanattary (tek Qytai eliniń emes) lezde Abaidyń óleńderin ózge tilderge aýdaryp, Abaidy zertteýge kirisip ketken eken! Bir jankúierleri tipti óleńdi jattap alyp, «Uly aqyndy nege buryn bilmegenbiz?» dep webo paraqshasyna jazypty! Sózim joq!..», - degen tańdanysymen bólisken ánshiniń dosy.
Sonymen qatar, ol Qytaida óner kórsetip, milliardtaǵan halqy bar eldi aýzyna qaratqan jas ánshiniń sońyna túsip, talantynan saiasi astar izdegenderge renishin bildirip, «tyrnaq astynan kir izdegenshe, Abaidyń bir shýmaq óleńin bolsa da jattap alýǵa» shaqyrdy.
«Bul baqytty sezine almaǵan beisharalardy aiaimyn! Tyrnaq astynan kir izdegenshe, Abaidyń bir shýmaq óleńin bolsa da jattap alyńyzdarshy!.. Ózge ulttar Uly aqynnyń óleńin sairap turǵanda, «erinshektik» boidy bilep, óz aqynymyzdyń bir óleń jolyn bilmei uiatqa qalmaiyq! Abai osy zamanda ómir súrse Dimash ekeýi jaqsy dos bolar edi...», - dep jazdy ol.
