Ánshi Dimash Qudaibergenniń Máskeýde 23 naýryzda ótetin ekinshi kontsertine arnalǵan bilettiń de basym bóligi satylyp ketken, dep habarlaidy QazAqparat tilshisi.
Ánshiniń anasy Svetlana Aitbaeva AQSh-taǵy baiqaý, aldaǵy kontsertteri týraly aityp berdi.
«Qazaqtyń ónerin, sonyń ishinde áni men mádenietin, ulttyq bolmysyn kórsetý maqsatynda AQSh-taǵy konkýrsqa qatysyp jatyr. Jeńiske jetedi dep oilaimyz, úmittenemiz. Negizi Dimashqa túsetin usynystar kóp. Degenmen kontsert berý, álemdik týrnege shyǵý ońai emes. Dimash jalǵyz ózi emes, janynda mýzykanttar, horeografiialyq ansambli bar. Onyń barlyǵy kóp daiyndyqty qajet etedi. Máskeýde, keiin Astanada kontserti bolady. Kanada, Seýl, Túrkiia men Qyrǵyzstan, Ózbekstan, jalpy TMD elderinen kontsert berýge shaqyrý tústi. Bárine biyl úlgermeidi», - dedi S. Aitbaeva.
Dimash Qudaibergen 22 naýryzda Máskeýde kontsert ótkizedi. Kópshiliktiń suranysymen 23 naýryzda da kórermenin qýantatyn boldy.
«Dimashtyń Reseidegi kontsertin eki el birge uiymdastyryp otyr. Qańtardyń orta tusynda 22 naýryzda ótetin kontserttiń barlyq bileti satylyp ketti. Keiin jan-jaqtan keletin jankúierleriniń talap-tilekterine orai taǵy bir kún kontsert berýge sheshim qabyldandy. Qazirgi kezde bilettiń basym bóligi satyldy degen aqparat bar», - dedi Svetlana Aitbaeva.
Eske sala ketsek, búgin ánshi Dimash Qudaibergenniń jankúierleri Aqtóbedegi mýzykalyq kolledjge fortepiano syilady.
