«Qazaqstan» ortalyq kontsert zalynda Qytaida ótken «I am singer» baiqaýynyń ekinshi oryn iegeri Dimash Qudaibergenniń qurmetine «Álem tanyǵan Dimash» merekelik sharasy ótip jatyr. Ánshi 3,5 myń jankúier jinalǵan sharanyń shymyldyǵyn «Týǵan jer» ánimen ashty, dep habarlaidy Baq.kz tilshisi.
Merekelik keshti quttyqtaý sózimen ashqan QR Mádeniet jáne sport ministri Arystanbek Muhamediuly Dimashty ósirip-jetkizgen atasy men ájesine qoshemet kórsetip, iyqtaryna shapan japty. Sondai-aq, Dimash ata-anasy - elimizdiń tanymal mýzykanttary Qanat pen Svetlana Aitbaevtarmen birge «Asyl anashym» ánin kópshilikke tartý etti.
Keshke Dimashtyń ustazdary keldi. Jas ánshige lebizin Aiman Musaqojaeva bildirse, video arqyly Bibigúl Tólegenova men Asanáli Áshimov batasyn berdi. Óz kezeginde Dimash ózin qoldaǵan azamattardyń barlyǵyna alǵysyn aitty.
«Árbir jetistikke jetken azamattardyń artynda júregi qazaq dep soǵatyn aq jaýlyqty analarymyz turady. Sol sebepten osy ýaqytqa deiin qanshama baiqaýlarda jeńiske jetýge tikelei úlken septigin tigizip júrgen ustazdarymyz aman bolsyn... Meni úlken sahnanyń tórine shyǵaryp, Dimash Qudaibergen etken qazaq halqyna myń taǵzym!», - degen Dimashqa halyq zor qoshemet bildirdi.
Sondai-aq, Dimash Memleket basshysy Nursultan Nazarbaevqa erekshe alǵysyn aitty.
«Bizdiń qazirgi tańda emin-erkin, qalaǵan halyqaralyq baiqaýda boi kórsetýge yqpal etip, jaǵdai jasaǵan, shet memleketke shyqqanda basymyzdy tik kóterip, Qazaqstan degen eldenmin dep maqtanyp aitýǵa úlken septigin tigizgen, zamanaýi Qazaqstannyń negizin qalaǵan Elbasy Nursultan Ábishuly Nazarbaevqa úlken alǵys aitamyn», - dedi Dimash.
Atap ótsek, búgin Dimash Qudaibergen Astanaǵa ushyp keldi. Ánshini áýejaida týǵan-týystary, dos-jarandary, jankúierleri qarsy aldy. Ony qarsy alýshylar qatarynda Mádeniet jáne sport ministri Arystanbek Muhamediuly da boldy.
Esterińizge sala ketsek, búkil álemdi erekshe daýysymen tánti etken Qazaqstannyń jas ánshisi Dimash Qudaibergen Qytaida ótip jatqan «I am singer» baiqaýynda ekinshi oryn aldy. Dimash finalda qytailyq ánshi Shań Venjemen birge Maikl Djeksonnyń «The Way You Make Me Feel», «Erth song» jáne «Billie Jean» ánderin shyrqaǵan bolatyn. Otandasymyzdyń óneri kezekti ret kórermen kóńilinen shyǵyp, halyqtyń qoshemetine ie boldy. Baiqaýdyń sheshýshi básekesin Qytailyq Hunan TV jáne Habar telearnasy kórsetti.
Dimash baiqaýdyń on kezeńnen turatyn irikteý básekelerin aiaqtap, jalpy esepte birinshi bolyp finalǵa ótken bolatyn. Jas ánshi konkýrsta «SOS», «Adagio», «Confessa», «5-elementtegi» ariia, «Tań sári», «Daididaý» men «Umytylmas kún» syndy ánderdi shyrqap, aqtyq básekege súrinbei jetken edi.
Sonymen qatar, Dimash Qudaibergen China Top music Awards sharasynda «Aziianyń eń tanymal ánshisi» ataǵyn alǵan bolatyn. 2001 jyldan beri jyl saiyn dástúrli túrde berilip kelgen Top Chinese Music Awards Qytaidaǵy Gremmi marapaty retinde tanylǵan.
Sýretter: Baýyrjan Jýasbaev
