QR Mádeniet jáne sport ministri Arystanbek Muhamediuly Qanat Aitbaevpen jáne Dimash Qudaibergenmen kezdesip, 19 qarashada ótetin kontserttiń jaiyn talqylady, dep habarlaidy QazAqparat tilshisi.
«Astanalyq «Terra balet» toby, sonymen qatar ult-aspaptar ansamblinde keremet óner kórsetip júrgen ul-qyzdar baryp, bizdiń qazaqtyń ánderine ulttyq reńk pen óń bere otyryp, súiemel jasaidy. Osy kontserttiń uiymdastyrylýyna qyz-jigitter atsalysyp, kómektesip jatyr. Amandyq bolsa, nátijesin kóresizder. Oryndalatyn ánderdiń 60 paiyzy qazaq tilinde bolady», - dedi Qanat Aitbaev.
Óz kezeginde Dimash Qudaibergen Londonda jandy daýysta, orkestrmen otyzǵa jýyq án aitatynyn habarlady.
Sonymen qatar, ánshi Astanada Denis Tenniń kórmesin uiymdastyrǵan jandarǵa alǵysyn bildirdi.
«Denis Ten - qazaqtyń eshqashan sónbeitin jaryq juldyzy. Túndeletip Qazaqstanǵa kelip, Denis Tenniń kórmesin ótkizip jatqan jandarǵa alǵysymdy bildireiin dep, kórmege bardym. Eshkim joq kezde ózimmen ózim kórmede ótken-ketkendi eske aldym. Denisti maqtaýdyń ózi artyq. Sizder ony keremet sportshy, daryn iesi retinde bilesizder, al men ony dos tuttym. Biz etene aralasyp, sońǵy jyldary jaqyn dos boldyq. Denistiń kishipeiildigi unaidy maǵan. Óte qarapaiym edi. Jalpy, biik belesterdi baǵyndyrǵan adamdar tákapparlyq tanytyp, pendeshilikke boi aldyrady ǵoi. Denistiń boiynan ondaidy eshqashan kórmedim», - dedi Dimash Qudaibergen.
Ánshi Denispen birge júrgen kezde dostar arasynda «Olimpiada chempiony bizben birge qarapaiym jerde tamaq ishe me?» dep ázildeitinin eske aldy.
«Keide túnde dalaǵa shyǵyp, eń arzan bir jerge bara salatynbyz. Onyń árbir aitqan sózi, jasaǵan eńbegi qazaqtyń, eliniń mártebesi úshin edi. Óitkeni, ózderińiz oilap qarasańyzdar, ol qazaqtyń tarihynda bolmaǵan jetistikterge jetti. El atynan osyndai azamattar bar ekenin dáleldeý úshin, mánerlep syrǵanaýdan qazaqtar da álem chempiony atana alatynyn dáleldeý úshin shetelde bilim aldy. Aldaǵy ýaqytta keiin Qazaqstanda osy júieni qolǵa alyp, shákirt tárbielesem dep armandady. Meniń kelesi kontsertimde ekeýmiz Beijińde nemese basqa elde úlken stadionda kontsert berip, «S.O.S» ánimen tandemde shyǵamyz dep armaǵandaǵan bolatynbyz. Endi Londonda ol ándi men ózim ǵana oryndaimyn», - dedi ol.
Daryndy ártis óziniń shyǵarmashylyq maqsaty týraly da aityp berdi.
«Men shetelde júrgen kezde mindetti túrde qazaqtyń halyq ánderi oryndalady. Meniń basty maqsatym ne? Kindik qanym tamǵan jerde qazaqtyń uly tulǵalary tyń dúnielerdi jaryqqa shyǵardy, al, biz, ánshiler múmkindiginshe ol týyndylardy nasihattaýymyz kerek. Meniń de maqsatym sol. Sondyqtan qazaqtyń halyq ánderi kóptep shyrqalatynyna kúmán keltirmeńiz. Jańa ánder de bar. Onyń qupiiasyn sizderge tolyq ashqym kelmeidi. Óitkeni, ony kontsertte (Londondaǵy) kórermender birinshi tyńdasa deimin», - dedi Dimash Qudaibergen kezdesý barysynda.
Óz kezeginde, Mádeniet jáne sport ministri Arystanbek Muhamediuly 19 qarashada ótetin Londondaǵy kontsertiniń barlyq bileti satylyp ketkenin aitty.
Ministrdiń aitýynsha, bilet satyp alǵan kórermenderdiń 3-4 paiyzy ǵana - qazaqstandyqtar.
«Barlyq biletterdi negizinen londondyqtar satyp aldy», - dedi ministr.
Aita ketsek, osy aidyń 19-da Londonda Dimashtyń jeke kontserti ótedi. Qazirgi tańda London ortalyǵyndaǵy ekrandarda qazaqstandyq ánshiniń kontserti jarnamalanyp jatyr.
