Qazaqstandyq ánshi Dimash Qudaibergen Qytaidyń Hýnan provintsiiasynda bolǵan sý tasqyny apatynan zardap shekkenderge aqshalai kómek kórsetti, dep habarlaidy QazAqparat.
Hunan telearnasynyń weibo áleýmettik paraqshasynda jariialanǵan aqparatqa qaraǵanda, Dimash Mango V qory arqyly Hýnan provintsiiasyndaǵy sý tasqynynan keiin qaita qalpyna keltirý jumystary úshin kómek retinde 300 myń iýan (14 million teńge) qarajat aýdarǵan.
Qazaqstandyq ánshi Hýnan provintsiiasynda ótken «Singer» án baiqaýy arqyly álemge tanylǵandyǵyn aita kelip, bul kómekti óziniń azamattyq boryshy dep esepteitindigin jetkizgen.
Aita keteiik, maýsym aiynyń sońynan bastap jaýǵan tolassyz jaýyn saldarynan Qytaidyń Hýnan provintsiiasynda alapat sý tasqyny bolyp, kóptegen adamdar úi-kúisiz qalǵan edi. Apattyń saldaryn joiýǵa Qytai úkimeti men eldiń tanymal adamdary qol ushyn berýde.
Eske salsaq, Dimash biylǵy jyldyń basynda Hýnan provintsiiasynyń ortalyq qalasy Chansha qalasynda «Singer 2017» án baiqaýyna qatysyp ekinshi oryndy jeńip aldy. Sol arqyly qazaqstandyq ánshi Qytaiǵa jáne álemniń kóptegen elderine tanymal boldy.
