Qazaq onkologiia jáne radiologiia ǵylymi-zertteý institýtynyń direktory Diliara Qaidarova Prezident Qasym-Jomart Toqaevtyń 2020 jylǵy 1 qyrkúiektegi «Jańa zamandaǵy Qazaqstan: Is-qimyl kezeńi» joldaýyna qatysty pikir bildirdi, dep habarlaidy QazAqparat.
«Prezident Qasym-Jomart Toqaev Qazaqstan halqyna Joldaýynda densaýlyq saqtaý júiesin damytý jónindegi mindetterdi atap ótti. Meditsina mamandary Memleket basshysynyń meditsina qyzmetkerlerine yntalandyrý ústemeaqylaryn tóleý týraly tapsyrmasyn zor yntamen qabyldady. Bul maqsatqa memlekettik biýdjetten 150 milliard teńge bólinedi. Prezident 2023 jyly meditsina qyzmetkerleriniń jalaqysy el boiynsha ortasha jalaqydan 2 esege jýyq ósetinin atap ótti. Meditsina qyzmetkerleriniń materialdyq ál-aýqatyn arttyrý meditsinalyq qyzmet kórsetý sapasyna oń áser etedi, olardyń biliktiligin arttyrýǵa degen umtylysyn arttyrady jáne olardyń erteńgi kúnge degen senimin nyǵaitady dep úmittenemiz» – deidi Diliara Qaidarova.
Onyń aitýynsha, búgingi tańda Qazaqstannyń barlyq oblystarynda aýyr naýqastarǵa onkologiialyq kómek kórsetetin 19 mekeme jumys isteidi. Onkologiialyq aýrýlarmen kúres jónindegi 2018-2022 jyldarǵa arnalǵan keshendi jospar sheńberinde óńirlik onkologiialyq ortalyqtardy qajetti zamanaýi jabdyqtarmen jaraqtandyrý, radiologiialyq apparattar parkin jańartý kózdelgen.
Sonymen qatar, Qazaqstannyń onkologiialyq qyzmeti jas kadrlardy, onkolog dárigerlerdi daiarlaýǵa, sondai-aq jumys istep turǵan meditsinalyq qyzmetkerlerdiń biliktiligin arttyrýǵa múddeli.
«Onkologiia naýqastaryn dári-dármekpen qamtý máselesine kelsek, dári jetkizýge «SQ-Farmatsiia» qurylymy jaýap beredi. Onkologiialyq naýqastar dári-dármekpen tegin qamtamasyz etiledi, olardy memleket esebinen satyp alady. Biraq, ókinishke orai, keide sheteldik, ómirlik mańyzdy dári-dármekterdi jetkizýde irkilister bolady, al onkologiiany emdeýde naýqas úshin ár minýt mańyzdy. Prezidenttiń Qazaqstanda farmatsevtikalyq óndiristi damytý týraly tapsyrmasy der kezinde aityldy jáne jaqyn arada onkologiialyq naýqastarǵa ómirlik mańyzy bar dári-dármekterdi uzaq ýaqyt kútýdiń qajeti joq jáne olar el ishinde árdaiym qoljetimdi bolady degen oidamyz», - deidi elimizdiń bas onkology.
Prezident óz sózinde jańa kópsalaly aýrýhanalardyń qurylysy týraly atap ótti. Buǵan deiin Ult Kóshbasshysy - Elbasy Nursultan Nazarbaevtyń tapsyrmasy boiynsha Elordada eń ozyq halyqaralyq tájiribe negizinde onkologiialyq naýqastarǵa joǵary tiimdi meditsinalyq kómek kórsetý úshin jańa Ulttyq ǵylymi onkologiialyq ortalyqtyń (UǴOO) qurylysy bastaldy. Jaqynda jańa jabdyqtarmen jabdyqtalǵan Ulttyq ǵylymi onkologiialyq ortalyq Qazaqstannyń túkpir-túkpirinen kelgen aýyr naýqastarǵa tegin onkologiialyq kómek kórsetetin bolady.
«QazOjRǴZI» AQ mamandardyń biliktiligin arttyrý boiynsha úlken jumys júrgizýde, sheteldik mamandarmen oqytý konferentsiialary, sheberlik-klasstar, týmorbordtar únemi ótkizilip turady. Biz joǵary bilikti kadrlardy daiarlaýǵa múddelimiz. Sońǵy birneshe jylda «QazOjRǴZI» AQ-nyń rezidentýrasynda ondaǵan jas mamandar bilim alyp, olar oqýdan keiin óńirlik onkologiialyq ortalyqtarǵa jiberildi. Onkologiialyq aýrýlarmen kúres - obyrdy erte diagnostikalaý, emdeý, onkologiialyq naýqastardyń ómir súrý sapasyn arttyrý – Qazaqstannyń áleýmettik saiasaty men densaýlyq saqtaý salasynyń basym mindetteri bolyp tabylady.
«QazOjRǴZI» AQ ujymy Memleket basshysynyń aitylǵan barlyq bastamalaryn qoldaidy. Biz memleketimiz ben qazaqstandyqtardyń densaýlyǵy úshin jumys isteimiz», – dep qortyndylady ǵylymi-zertteý institýtynyń direktory Diliara Qaidarova.
