"Dikii Arman" laqap atymen tanymal Arman Jumageldievtiń anasy qyrǵyzstandyqtardan keshirim surap, "Paiǵambar da kúieý balasyn syilaǵanyn" eske saldy, - dep habarlaidy Sputnik Qazaqstan.
Qańtar oqiǵasy kezinde Arman Jumageldiev Qyrǵyzstan turǵyndary Almaty dúkenderin tonap júr dep málimdegen bolatyn. Onyń anasy Roza Jumageldieva ulynyń osy sózinen ultaralyq alaýyzdyq týdyratyn túsinispeýshilik paida boldy dep sanaidy.
"Ol sizderden talai ret keshirim suraityn edi. Qazir osyndai jaǵdaida otyrǵannan keiin onyń atynan, ózimniń atynan sizderden keshirim suraimyn. Ol bir jerde durys sóilemegen shyǵar, durys túsinbei, eki ortada ulttyq arazdyq bolyp ketti me, bilmeimin ózi. Júregim aýyrdy. Shyn máninde, ondai oiy joq edi. Ol qyrǵyz elin óte jaqsy kóredi", - dedi Jumageldieva.
Osy oraida ol qyrǵyzdyń qyzy kelin bolyp túskenin eske saldy.
"Qyrǵyzdyń qyzy Aikól Álikjanqyzy maǵan tuńǵysh nemere syilady. Biz baqytty ómir súrip otyr edik. Sony kórýge kelgen edi. Osyndai jaǵdaiǵa dýshar bolady dep kim bilgen? Men sizderden taǵy da keshirim suraimyn. Biz óte jaqynbyz, quda-qudaǵimyz. "Quda myńjyldyq, kúieý bala júzjyldyq" deidi. Paiǵambar da kúieý balasyn syilaǵan. Sondyqtan syilap, qabyldap, keshirip, jaqsy qarym-qatynasta bolaiyq", - deidi Armannyń anasy.
Beineúndeý Aikól Álikjanovanyń Instagram paraqshasynda jariialandy. Armannyń jubaiy qyrǵyz elinen qaiyn enesin qoldaýdy surady. Onyń sózine qaraǵanda, bas kezinde Armannyń ózi beineúndeý jariialaidy degen jospar bolǵan. Biraq oǵan aýdio jáne video qurylǵylardy kirgizýge bolmaidy.
"Biraq anasynyń sózine tolyq qosylady jáne osy túsinispeýshilik sátti sheshiledi dep senedi. Ol, shynymen de, qyrǵyzdardy kurmetteidi, tipti, maqtan tutady", - dep jazdy Álikjanova.
Eske salsaq, qańtar oqiǵasy kezinde Almatyda "Dikii Arman" bastaǵan uiymdasqan qylmystyq toptyń alty múshesi ustaldy. Oǵan jappai tártipsizdik uiymdastyrdy degen aiyp taǵylyp otyr. Arnaiy prokýratýranyń málimetine sáikes, Dikii Armannyń adamdary 24 beibit turǵyndy uryp-soǵyp, zańsyz qamap qoiǵan. Bir adam qaitys boldy.
Arman Jumageldievtiń ózi jappai tártipsizdikter kezinde soqqyǵa jyǵylǵanyn málimdedi. Al "dúkenderdi Qyrǵyzstan azamattary tonap júr" degen sózi kórshi eldiń ashý-yzasyn týǵyzdy.
