Foto ashyq derekkózden alyndy
QR Bas prokýrory Berik Asylov Májiliste qańtar oqiǵasynda Dikii Arman men Qairat Qudaibergenniń qandai qylmystar jasaǵanyn aityp berdi, dep habarlaidy QazAqparat agenttigi.
«2021 jyl boiy, jasyryn túrde radikaldy shara qoldaný úshin oryndaýshylardy daiyndaý júrgizilgenin ǵana aita alamyn. Oryndaýshylardyń qatarynda uiymdasqan qylmystyq toptar bolǵan. Olar adamdardy jinap, qarýlandyrǵan, ratsiia jáne kólik satyp alǵan. Tergeý anyqtaǵandai, osy áreketterdiń basynda kúsh qurylymdarynyń jekelegen ókilderi turǵan. Mysaly, tergeý versiiasy boiynsha, Almatyda Jumageldiev (laqap aty «Dikii Arman») erekshe ról atqarǵan», - dedi Berik Asylov Májilistiń búgingi otyrysynda.
Onyń áreketin UQK-degi kýratory úilestirgeni anyqtaldy. Ol tártipsizdikterdi uiymdastyryp, adamdar tobyn basqarýdy óz qolyna alyp, bilikke bultartpas talap qoiý úshin «halyq keńesi» degendi qurýy tiis bolǵan.
«Oǵan Almaty qalalyq máslihatynyń eks-depýtaty, sondai-aq qylmystyq toptyń belsendi múshesi Mahatov kómektesken, ol Almatydaǵy «Qazaqstan» qonaq úiine kelýshi banditterdi qarýlandyrǵan.
«Alaida olar jappai narazylyqty basqara almady. Halyq olarǵa ergen joq. UQK-niń burynǵy tóraǵasynyń ustalǵany týraly aqparat alǵan soń, keiin ózin aqtap alý úshin maroderlermen kúresti jeleý etip, sodyrlarǵa qala turǵyndaryna shabýyl jasaý tapsyrylǵan. Sol úshin 6 qańtarda olar qalanyń ár jerinen 24 kezdeisoq adamdy urlap ketken, sosyn «Ritz Carlton» jáne «Qazaqstan» qonaq úileriniń parkinginde olardy uryp-soǵyp, ustap otyrǵan. Keiin olardy qalanyń shetine aparyp, UQK qyzmetkerleriniń qarýly kúzetimen konteinerde túnetken. Sosyn olardy áýejaiǵa jetkizgen, sol jerde Ótepbaev azaptaýdan qaitys bolǵan. Osy faktiler boiynsha tergeýdi aiaqtadyq. Qazir qujattar qaralýda», - dep túsindirdi Bas prokýror.
