L.N.Gýmilev atyndaǵy EUÝ prorektory, QR UǴA akademigi Dihan Qamzabekul «AMANAT» partiiasy keleshegi týraly pikir bildirdi, dep habarlaidy QazAqparat.
«Partiia da qoǵamnyń ainasy,. Ol qoǵamdaǵy bilikke jetken toptyń da, bilikke umtylýshy toptyń da arman-múddesin kórsetedi. Árine, biz Nur Otan-dy biliktiń partiiasy dep keldik. Parlamenttegi negizgi kópshilikti de solar qurady. Qazir qoǵam ózgerdi. 5 qańtardan keiingi qoǵamdy, qalai desek te, qandai ólshemmen qarasaq ta, ózgergen qoǵam. Ony ýaqyttyń ózi ózgertti, Qazaq eliniń damýy osyǵan alyp keldi. Partiianyń «AMANAT» degen atpen jańǵyrǵany ádebietshi, ádeibet tarizynyń mamany retinde meniń kóńilimnen shyǵyp otyr», - dedi ǵalym.
Akademik jańǵyrýdy bastan ótkerip jatqan bilik partiiasy halyq 30 jyldan beri kútip kele jatqan igilikterdiń qoǵam ómirine enýine jol ashýǵa tiis dep esepteidi.
«Burynnan kele jatqan eldik arqaýymyz bar. Sondaǵy negizgi bir kilt sózderdiń biri osy «AMANAT». Eń basty másele nede? Halyqtyń amanaty nede edi? Búkil halyq táýelsizdikti armandap kútti. Ol elge áleýmettik igilikter ákeledi, halyqtyń óz qoly óz aýzyna jetedi dep eseptedi. Biz tilden, dástúrden, mádenietten kembaǵal bolyp qalǵanbyz. Otarshyldyq dáýirdiń azabyn kóp tarttyq. Sonyń ornyn túgendeidi dep kúttik. «AMANAT» sol armandy oryndaýy kerek», - deidi qoǵam qairatkeri.
Onyń aitýyna qaraǵanda, «AMANAT» eń áýeli áleýmetshil partiiaǵa ainalýy kerek.
«Men bul partiiaǵa 2004 jyldan beri múshemin. Júrgen jerimniń bárinde partiiamyzdyń jańarýy týraly osy oidy aityp júrmin. Bul áleýmetshil, halyqtyń múddesin ornatatyn partiia bolýy kerek.
Al rýhani máselede osyǵan deiin ne oryndalmady? Sony jerge túsip, halyqpen birge bolyp, arman-múddesin oryndaityn partiia bolýy shart.
Bárimiz elden shyqtyq. Aýyldarda búkil istiń qiiýyn keltirip, tetigin aýyp otyratyn aqsaqaldar bolady. Sol el aǵalary qalai jumys isteidi? Osyndai ulttyń tanymynda bar tetikterdi ujym kóleminde, memleket kóleminde qarap, iske asyrýǵa bolady. Is basynda júrgen «AMANAT» partiiasynyń músheleri osyny qolǵa alýy kerek dep oilaimyn. Bul da qoǵamnyń bir ólshemi, barometri. Erteń halyq berilgen ýádeniń esebin suraidy. Onyń ústine túrli sailaýlar kele jatyr. Aýyl ákimderin, aýdan ákimderin sailaý jolǵa qoiylyp jatyr. Munyń bárinde «AMANAT» basqa da partiialarmen teń básekede pisip, jetilýi kerek. Bizde jalpy partiialarymyz pisip, jetilmei qalǵan. Qansha jerden nasihattap, atyn jarqyratyp ilip qoiǵanmen, partiia adam sekildi ózi jetilýi kerek», - dedi Dihan Qamzabek.
