24-25 qazan kúnderi Nur-Sultan qalasynda ótetin «Digital Bridge» halyqaralyq tehnologiialyq forýmynda IT-salasyndaǵy jańa trendter talqylanady.
Atalǵan forýmdaǵy basty shara «Bolashaqtyń bilimi: tehnologiialar bilim salasyn qalai ózgertedi» atty plenarlyq sessiia bolady. Osyǵan orai, álemniń túkpir-túkpirinen kelgen sarapshylar qaýymy bilim salasyndaǵy ózgerister týraly oi tolǵap, sol saladaǵy túitkildi máselelerdi tehnologiialar qalai sheshetinin aityp beredi.
«Maman daiarlaýdyń burynǵy tásili qazirgi shyndyqtarǵa tótep bere almai jatqanyn túsinip kelemiz. Internet paida bolǵanǵa deiin ómir baiaý jyljityn. Máselen, buryn injenerler 4 jyl oqyp, ol bilimi ómir boiyna jaraityn. Dárigerler de solai, olar bir ota túrin bir tásil arqyly ómir boiy jasap júre beretin. Keiin internet paida bolyp, jahandaný protsesi qarqyndy júrýi nátijesinde tártip-tásilder túbegeili ózgerdi. Nátijesinde injeneriia, meditsina salasyna jańa ózgerister, jańa ádister jáne jańa tehnologiialar keldi. Endi ýniversitette ǵana oqý jetkiliksiz, nege deseńiz buǵan tek ýniversette alǵan bilimdi ǵana qoldana almaimyz», – deidi bilim salasy boiynsha ekspert, biotehnolog Dámel Mektepbaeva.
Sarapshynyń sózinshe, joǵary oqý ornynda alǵan bilimmen qosa qaitadan izdenýge, mashyqtanýǵa, jańa bilim alýǵa týra keledi. Sol sebepten de bolashaqtyń biliminde úzdiksiz oqý qajettiligi týyndaidy.
«Digital Bridge» forýmynda qatysýshylarǵa arnalǵan ashyq talqylaýlar men dóńgelek ústelder uiymdastyrylyp, venchýrlyq qarjylandyrý, biznes-inkýbatsiia, tsifrlyq media salalaryndaǵy ózgerister men jańashyldyqtar qozǵalady. Forým aiasynda Astana IT University, Alem baǵdarlamalaý mektebi resmi túrde ashylady.
Eske sala ketsek, 2018 jyldyń 5 qarashasynda «Digital Bridge» halyqaralyq tehnologiialyq forýmy ótken bolatyn. Oǵan álemniń 23 elinen 600-den astam qatysýshy jáne 50-ge jýyq spiker kelgen edi.
