2020 jyly Ótken jyly qazaqstandyq servisterge DDoS-shabýyldar sany 44% artqan. Bul týraly Almatyda ótken «Digital Almaty 2021 - Tsifrlyq qaita júkteý: jańa bolmysqa serpilis» halyqaralyq forýmynda málim boldy, dep habarlaidy "Ult aqparat".
«Memlekettik tehnikalyq qyzmet» AQ baspasóz qyzmeti taratqan málimetterge qaraǵanda, epidemiologiialyq jaǵdaiǵa bailanysty onlain formatta ótken is-sharada QR Prezidenti Qasym-Jomart Toqaev, Dúniejúzilik Ekonomikalyq forýmnyń prezidenti Berge Brende, Google vitse-prezidenti Vint Serf quttyqtaý sóz sóiledi.
Forým sheńberinde «Pandemiia kezeńindegi aqparattyq qaýipsizdikke syn–qaterler» paneldik sessiiasy uiymdastyryldy. Onda «Memlekettik tehnikalyq qyzmet» AQ Aqparattyq qaýipsizdiktiń ulttyq úilestirý ortalyǵy (AQUÚO) direktorynyń orynbasary Aleksandr Kosenkov «2020 – Qaznettegi AQ: Tsifrlar men faktiler» taqyrybymen spiker bolyp sóz sóiledi. Sondai-aq, ol forýmǵa qatysýshylarǵa birneshe ózekti keisterdi tanystyrdy.
«Memlekettik tehnikalyq qyzmet» AQ ókiliniń derekterinshe, ótken jyly Qazaqstanda aqparattyq qaýipsizdiktiń 24 053 intsidenti tirkeldi jáne pysyqtaldy. Sondai-aq fishingtik internet-resýrstar sany 58%, qazaqstandyq servisterge qatysty DDoS-shabýyldar 44% artty.
«Bul rette kóbinese memlekettik jáne kvazimemlekettik sektordyń, sondai-aq aqparattyq-kommýnikatsiialyq infraqurylymnyń asa mańyzdy obektileriniń (AKIAMO) osaldyqtaryn paidalanýǵa 1 674 áreket jasaldy», - deidi Aleksandr Kosenkov.
Esterińizge sala keteiik, «Digital Almaty» osymen tórtinshi jyl qatarynan ótkizilip keledi jáne forýmnyń negizgi maqsaty tsifrlyq transformatsiianyń jańa strategiialary men jańa tehnologiialar salasyndaǵy trendterdi talqylaý maqsatynda óńirlik jáne jahandyq deńgeide dialog júrgizý.
