Reseilik oppozitsiialyq saiasatker Aleksei Navalnyiǵa áskeri ýdyń "Novichoktan" da qaýiptirek jańa túrin bergen. Bul týraly sársenbi kúni qupiia derekkózge súiengen nemistiń Die Zeit basylymy jazdy. Jýrnalistiń jazýynsha, ýdyń jańa túrin arnaiy qyzmettiń jaqsy jabdyqtalǵan zerthanasynan basqa jerde jasaý múmkin emes. Sol sebepti saiasatkerge ý berý operatsiiasyn reseilik FSB uiymdastyrýy múmkin.
Nemis biligi saiasatkerdi ańdyǵan arnaiy qyzmet ókili qaýipti zatty Navalnyi shái ishken keseniń jiegine nemese keseniń ózine shashyp ketken bolýy múmkin dep boljap otyr deidi Die Zeit. Basylymnyń jazýynsha, ýdyń qaldyqtary saiasatker sý ishken bótelkeniń aýzy men saiasatkerdiń qolynan da tabylǵan.
Nemis basylymynyń jazýynsha, ýdyń áser etý ýaqytyn eseptegen qylmyskerler Navalnyi Tomskiden Máskeýge qarai ushqan kezde jolda qaitys bolady dep shamalaǵan bolýy múmkin. Gazettiń jazýynsha, ushaqty shuǵyl qondyrý týraly sheshim shyǵarǵan ushqyshtyń jedel áreketi men oppozitsionerge birden atropin dárisin ekken jedel járdem dárigerleriniń áreketiniń arqasynda saiasatker aman qalyp otyr.
Die Zeit jazýynsha, Navalnyidy únemi ańdyǵandyqtan ony úshinshi tarap bolmasa sheteldiń arnaiy qyzmeti joiǵysy kelgen degen boljamnyń máni joq. "Bul shyndyqqa janasatyn tek bir ǵana qorytyndy jasaýǵa múmkindik beredi: Kreml ózin synaǵan saiasatkerdi joldan ketirýge buiryq bergen" dep jazady basylym.
Reseilik oppozitsioner, Jemqorlyqpen kúres qorynyń jetekshisi 44 jastaǵy Navalnyi 20 tamyz kúni Tomskiden Máskeýge baǵyt alǵan ushaqta jaǵdaiy kúrt nasharlaǵan. Ushaq saiasatker densaýlyǵynyń nasharlaýyna bailanysty Omby qalasyna qonýǵa májbúr bolǵan. Saiasatker Omby aýrýhanasynda eki kún jatty. Ondaǵy dárigerler Navalnyidyń zat almasý protsesi buzylǵan dep málimdedi. Olar "saiasatker ýlandy" degen Navalnyi jaqtastarynyń tujyrymyn joqqa shyǵarǵan. Degenmen "Medýzanyń" jazýynsha, Ombyda saiasatkerdiń ýlanǵany "aidan anyq bolǵandyqtan" jedel járdem kóliginde oǵan atropin salǵan.
22 tamyzda týystary men jaqtastarynyń talabymen saiasatker Berlindegi "Sharite" klinikasyna aýystyryldy. Nemis dárigerleri zerthanada teksergennen keiin Germaniia úkimeti Aleksei Navalnyi quramy jaǵynan sovet odaǵy kezinde shyǵarylǵan áskeri "Novichok" ýyna uqsas zatpen ýlandy dep málimdedi.
Dúisenbi kúni nemis dárigerleri Navalnyidyń densaýlyǵy jaqsarǵanyn, komadan shyqqanyn habarlady. Olar ýdyń saiasatker aǵzasynda uzaq saqtalyp, densaýlyǵyna áser etýi múmkin degen boljamdy da joqqa shyǵarmaidy.
