Shotlandiianyń Glazgo qalasynda Devis kýbogy finaldyq kezeńiniń toptyq básekesi aiaqtaldy, dep habarlaidy QazAqparat.
Qazaqstan quramasy D tobyndaǵy sońǵy matchyn Devis kýbogynyń on dúrkin chempiony Ulybritaniiamen ótkizdi.
Qazaqstandyq Dmitrii Popko «Úlken dýlyǵa» týrniriniń úsh dúrkin chempiony, eki márte Olimpiada jeńimpazy Endi Marreige 4:6, 3:6 esebimen ese jiberse, Aleksandr Býblik Kemeron Norridi utty – 6:4, 6:3.
Juptyq básekede Aleksandr Nedovesov pen Aleksandr Býblik álemniń birinshi jáne úshinshi raketkalary Djo Solsberi men Nil Skýpskige qatty qarsylyq kórsetti. Úsh set te tai-breikpen aiaqtalyp, sońǵy sátte ulybritaniialyqtar jeńisti julyp aldy – 6:7, 7:6, 6:7.
Jalpy esep – 1:2, Ulybritaniia paidasynda.
Toptyq báseke barysynda Býblik pen Nedovesov álemniń juptyq syndaǵy kóshbasshylary, niderlandylyqtar Kolhof (4 ATP) pen Middelkopty, sondai-aq amerikalyqtar Ram (2 ATR) men Sokty jeńdi.
D tobynan Niderland pen AQSh quramalary shirek finalǵa shyqty. Endi qazaqstandyq tennisshiler aldaǵy jyldyń aqpanynda kelesi komandalyq álem chempionatynyń joldamasy úshin talasady. Jerebe qarasha aiynyń aiaǵynda tartylady.
