Qazaqstannyń bolashaqta gaz áleýetin qoldaný múmkinshiligi óte joǵary. Mundai pikirdi búgin QR Prezidenti Nursultan Nazarbaevtyń tóraǵalyǵymen ótip jatqan Sheteldik investorlar jónindegi keńestiń 30-shy jalpy otyrysynda «Eni» kompaniiasynyń bas atqarýshy direktory Klaýdio Deskaltsi bildirdi, dep habarlaidy QazAqparat.
Qazaqstanǵa qatysty aitar bolsa, respýblika qazirdiń ózinde klimattyń ózgerýi problemalaryn sheshýde. Ziiandy qaldyqtarǵa tiimdi baqylaý engizip, olardyń kólemin qysqartýdy yntalandyrýda jáne parnikti gazdarǵa arnalǵan kvotalardy satýda. Memleket sońǵy 10 jyldyń ishinde kómirqyshqyl gazdyń qarqyndy shyǵarylýyn shamamen 20 paiyzǵa tómendetý arqyly klimattyń ózgerýimen kúreste tabysty ilgerilep keledi. Buǵan qosa elektr energetika salasyndaǵy gazdyń úlesin arttyrý esebinen kórsetkishti jaqsarta túsýge de múmkinshiligi zor. Búginde atalǵan saladaǵy kómirdiń úlesi 64 protsentti qurap otyr», - dedi Deskaltsi.
Osy rette ol bolashaqta Qazaqstannyń shamamen 2 trillion tekshe metrdi quraityn gaz qory áleýetin qoldanýǵa múmkinshiligi bar ekendigin atap ótti.
«Ekologiialyq turǵydan alyp qaraǵanda, gaz elektr stansalary barynsha tiimdi jáne kómir elektr stansalarymen salystyrǵanda kómir qyshqyl gazy shyǵaryndylarynyń shamamen jartysyn óndiredi. Munan bólek, Qazaqstannyń jel jáne kún energiiasyn óndirýde de áleýeti bar. Biz mundai jobalardy aýqymdy túrde júzege asyrý energiia tutynýdyń qazirdi qurylymyna paida ákeledi jáne elektr energiiasyn óndirý júiesindegi kómirtek izin birtindep tómendetýge múmkindik beredi dep oilaimyz», - dedi «Eni» kompaniiasynyń bas atqarýshy direktory.
Aita keteiik, Sheteldik investorlary keńesi Qazaqstan Prezidentiniń tóraǵalyǵymen ótetin keńesshi-konsýltativti organ. Keńes 1998 jyly eldegi investitsiialyq qyzmet pen investitsiialyq ahýaldy jaqsartýmen tikelei bailanysty ózekti máselelerdi tiimdi sheshý úshin memleket pen sheteldik investorlar arasyndaǵy tikelei únqatysýdy qamtamasyz etý maqsatynda qurylǵan. Eldiń investitsiialyq saiasaty men ekonomikalyq damýynyń basty aspektileri boiynsha Qazaqstan Prezidenti men Úkimetiniń qaraýyna usynymdar men usynystardy ázirleý Keńestiń basty mindeti sanalady.
.jpeg)