Foto: Instagram.com
Májilis depýtaty Baqytjan Bazarbektiń jubaiy, kásipker Adel Ádilova halyq qalaýlylarynyń "jarqyraǵan ómiri" týraly túsinikti seiiltpek bolyp, Astanadaǵy qyzmettik páterin kórsetti. Alaida, jeli qoldanýshylarynyń kóbi onyń shynaiylyǵyna kúmánmen qarady, dep habarlaidy Ult.kz.
Ádilova áleýmettik jelige jariialaǵan videosynda qarapaiym úsh bólmeli páterge ekskýrsiia jasap shyqqan. Kadrlarda qonaq bólmede divan, shkaf jáne jubaiynyń marapattary kórinedi. Al jatyn bólmede — qarapaiym tósek pen eski jihaz. Bir sátte ol komodtyń tutqasyn ashpaq bolǵanda, ol synyp qaldy.
"Kórip turǵandaryńyzdai, jihazdary eski. Biz memlekettik qyzmetkerdiń shynaiy ómirin kórsetkimiz keldi. Bul úi 2004 jyly paidalanýǵa berilgen, barlyq jihazǵa 20 jyl bolǵan", — dedi ol.
Ádilovanyń aitýynsha, otbasy bul páterde 2023 jyldan beri turady. Úi ár depýtatqa qyzmettik negizde beriledi, terezeleri Máńgilik El dańǵylyna, Senat pen Májilis ǵimarattaryna qaraidy. Áleýmettik jelidegi pikirlerge qaraǵanda, video “Nursaia-1” turǵyn úi kesheninde túsirilgen.
Alaida jeli qoldanýshylary videoǵa kúmánmen qarady. Kópshiligi páter “arnaiy túsirilim úshin daiyndalǵan” dep boljaidy:
“Onda shyn máninde jalǵa alýshylar turatyn siiaqty, marapattardy túsirilim aldynda qoiǵan”,
“Depýtattar mundai páterde turady degenge eshkim senbeidi”,
“Bastysy – halyqqa senimdi túrde ‘lapsha ilý’”,
“Cartier saqinasyn sheship qoiý kerek edi”,
“Tipti óz shkafynyń synǵanyn da bilmeidi”,
“Videodan tańqaldyrǵany — ne úshin sonsha medal alǵany ǵana”.
