Búgin Parlament palatalarynyń birlesken otyrysynda Májilis Tóraǵasy Nurlan Nyǵmatýlin biyl qabyldanǵan mańyzdy zańdar týraly aitty, dep habarlaidy QazAqparat.
«Eń aldymen, depýtattyq korpýs Memleket basshysy alǵa tartqan saiasi reformany zań jaǵynan qamtamasyz etti. Bul baǵytta elimizdiń «Sailaý týraly» Konstitýtsiialyq zań jobasyna eleýli túzetýler engizildi. Onda Prezidenttiń usynysy boiynsha saiasi partiialardyń Májiliske ótý shegi 7-den 5 paiyzǵa deiin tómendetildi», - dedi Nyǵmatýlin.
Sonymen qatar ol sailaýda beriletin biýlletenderge «barlyǵyna qarsymyn» degen jańa baǵan engizilgenin eske saldy. Taǵy bir erekshelik – aýyldyń jáne aýyldyq okrýg ákimderin tikelei sailaýdy qatamasyz etetin normalar qosyldy. Bul normalar memlekettik organdar men halyq arasyndaǵy bailanysty kúsheitýge, ákimderdiń turǵyndar aldyndaǵy jaýapkershiligin nyǵaitýǵa jáne aýyl azamattarynyń saiasi belsendiligin odan ári arttyrýǵa yqpal etedi.
«Osy sessiiada biz qabyldaǵan jáne búkil eldiń nazarynda bolǵan taǵy bir zań jobasy – ol «Qazaqstan Respýblikasynyń keibir zańnamalyq aktilerine jer qatynastary máseleleri boiynsha ózgerister men tolyqtyrýlar engizý týraly» qujat. Osyǵan bailanysty tikelei Memleket basshysy Qasym-Jomart Toqaevtyń bastamasymen zań deigeiinde naqty sheshim qabyldandy. Endi, jerimizdi sheteldikterge satýǵa da, jalǵa berýge de tolyqtai tyiym salyndy. Osy salanyń basqa suraqtaryn sheshý úshin Parlament jer qatynastary týraly zań qabyldady. Zańǵa aýyl sharýashylyǵy maqsatyndaǵy jerlerdi jalǵa berý institýtyn saqtai otyryp, jerdi jekemenshikke berýdi 5 jylǵa toqtatý týraly norma engizildi», - dedi Májilis tóraǵasy.
Budan buryn habarlanǵandai, Búgin Parlament palatalarynyń birlesken otyrysy ótip, onda jetinshi sailanǵan Parlamenttiń birinshi sessiiasy resmi túrde jabyldy. Osy oraida Parlament depýtattary kanikýlǵa ketti.
Eske sala keteiik, biyl 13 mamyrda Memleket basshysy jerdi sheteldikterge jeke menshikke jáne jalǵa berýge tyiym salatyn zańǵa qol qoidy.
Sonymen qatar, 24 maýsymda Parlament jerge qatysty moratoriidi 5 jylǵa uzartý men jaiylym boiynsha zańdy qabyldady.
Ótken sessiia barysynda Parlament palatalarynyń úsh birlesken otyrysy, Májilistiń 23, al Senattyń 21 jalpy otyrysy ótkizildi.
Sessiia bastalǵan kezde qos palatanyń qaraýynda 104 zań jobasy boldy. Búginde onyń 63-i qabyldandy, sondai-aq 58-ine Prezident qol qoiyp, kúshine endi.
