Búgin Parlament palatalarynyń birlesken otyrysy ótip, altynshy sailanǵan Parlament ekinshi sessiiasyn aiaqtady, dep habarlaidy "Ult aqparat".
«Qai kezeńde bolsa da elimiz úshin árqashanda zańnyń orny erekshe, mańyzy óte zor. Búgin biz sol zańdardy shyǵaratyn elimizdegi eń joǵary ókiletti organ qos palataly Parlamettiń kezekti sessiiasyn aiaqtap otyrmyz. Altynshy shaqyrylǵan Parlamenttiń ekinshi sessiiasy óte mańyzdy jáne tarihi kezeńde ótti deýge bolady», - dep toqtaldy QR Parlamenti Májilisiniń tóraǵasy Nurlan Nyǵmatýlin.
Osyǵan orai ol dástúr boiynsha atqarylǵan jumystarǵa esep berip, bolashaq josparlarmen bólise kele, Qazaqstan Respýblikasy Táýelsizdiginiń 25 jyldyǵy Deklaratsiiasy qabyldanǵanyn, iri konstitýtsiialyq reformalar júrgizilgenin eske salyp ótti. Bul tikelei halqymyzdyń bolashaǵy úshin jasalǵan óte mańyzdy qadam.
«Osyndai óte jaýapty kezeńde Parlament depýtattary Prezidentimizdiń ekinshi sessiianyń ashylýynda alǵa qoiǵan strategiialyq tapsyrmalardy júzege asyrýǵa belsene aralasty. Ekinshi sessiiada qos palatanyń alty birlesken otyrysy, Májilistiń 38 jáne Senattyń 25 jalpy otyrystary ótti. Bul kezeńde Parlament qaraýynda 111 zań jobasy boldy, onyń 84-i qabyldandy. Olardyń ishinde 15 zań jobasyna bizdiń depýtattarymyz ózderi bastamashy boldy. Parlament qabyldanǵan 66 zańǵa búgingi kúni Prezident qol qoiyp, olar óz kúshine endi», - dedi Májilis tóraǵasy.
