Májilistegi «Aq jol» fraktsiiasynyń depýtattary halyqaralyq deńgeide moiyndalǵan vaktsinalarmen halyqty qajetti kólemde qamtamasyz etý máselesin kóterdi, dep habarlaidy QazAqparat.
Depýtat Ǵani Hamzin osyǵan deiin «Aq jol» fraktsiiasy shetelge saparmen shyǵýdy josparlap júrgen stýdentter, biznesmender men basqa da azamattar úshin halyqaralyq deńgeide moiyndalǵan vaktsinalardy, onyń arasynda Pfizer-di aqyly negizde usyný máselesin kótergenin eske saldy.
«Qazirgi kezde Qazaqstanda Spýtnik-V, Qazvac pen Sinopharm barsha halyq úshin, al Pfizer adamdardyń keibir sanattary na qoljetimdi. Olardyń arasynda Sinopharm men Pfizer Dúniejúzilik densaýlyq saqtaý uiymy tarapynan moiyndalǵan. 16 qarashada aqyly negizde óz erki boiynsha Qazaqstan halqyn vaktsinalaý úshin Comirnaty Pfizer-di kommertsiialyq naryqta COVID-19-ǵa qarsy ekpe retinde ótkizý týraly Úkimettiń qaýly jobasyna qoldaý jasaldy. Alaida osy preparatpen aqyly negizde vaktsinalaý áli kúnge deiin bastalmady», - dedi depýtat Densaýlyq saqtaý ministri Ajar Ǵiniiattyń atyna joldaǵan saýalynda.
Sonymen qatar ol qazirgi kezde Sinopharm vaktsinasynyń birqatar aýrýhanalarda tapshylyǵy baiqalyp otyrǵany jaily aqparat túsip jatqanyn aitty.
«Aqyly negizde jasalatyn Pfizer-di barsha el kútip otyr. Bul turǵyda revaktsinalaýǵa nietti turǵyndardy da eskerý kerek. Adamdardyń kóbisinde Pfizer vaktsinasyn aqsha tóletip saldyrýǵa múmkindigi bar, alaida aqyly negizde osy ekpeni saldyrý qashan bastalatyny belgisiz. Osy oraida Pfizer-di aqyly negizde saldyrýdyń naqty datasy eshbir jerde jariialanbaǵan. Bul óz kezeginde adamdardyń josparyn buzyp otyr», - dedi ol.
Bul turǵyda «Aq jol» depýtattyq fraktsiiasy tiisti usynystar jasady:
1. Shetelge shyǵatyn «Bolashaq» baǵdarlamasynyń stipendiattaryn, kásipkerlerdi jáne basqa da azamattardy qajet bolǵan jaǵdaida aqyly negizde tez arada halyqaralyq moiyndalǵan preparattarmen vaktsinalaýdy bastaý kerek.
2. Dúniejúzilik densaýlyq saqtaý uiymy moiyndaǵan vaktsinalardyń kerek kólemin azamattardyń barlyq sanaty úshin qamtamasyz etý kerek.
3. Pfizer preparatymen aqyly negizde vaktsinalaýdyń naqty datasy jariialanýy tiis.
4. Otandyq QazVac preparatyn Dúniejúzilik densaýlyq saqtaý uiymy jáne álemniń jetekshi elderiniń farmatsevtikalyq ákimshilikteri halyqaralyq deńgeide taný úshin qabyldanyp jatqan sharalar týraly habarlaý.
