Jyl saiyn mikroqarjy uiymdarynda problemalyq qaryzdar úlesi artyp keledi. Mikroqarjy uiymdarynyń portfelindegi problemalyq qaryzdar kólemi 914 myńdy nemese jartysynan astamyn quraidy. Bul týraly Májilis depýtaty Dániia Espaeva aitty, dep habarlaidy QazAqparat.
Depýtat búgin Májiliste «Jeke tulǵalardyń bankrottyǵy týraly» zań jobasyn qarastyrýdy bastaǵanyn eske saldy.
«Bankrottyq – máseleniń saldary ekenin este ustaǵan jón, al onyń sebebi basqada jatyr. Halyq tabysynyń tómen bolýy, paiyzdyq mólsherlemelerdiń shamadan tys joǵary bolýy jáne jeke tulǵalarǵa nesieniń tym qoljetimdi bolýy bankrottyqqa ákep soǵady. Halyqtyń negizgi bóliginiń tabysynyń tómendigi olardy baspanany jalǵa alý, balalardy oqytý, basqa bankte ai saiyn nesie tóleý, azyq-túlik jáne basqa da qajettilikter úshin onlain-qaryz alýǵa májbúr etedi. Kepilsiz qaryz tez jáne tabys deńgeiin eskermei berilýi, joǵary paiyzdyq mólsherleme túrindegi syn-qater halyqtyń jappai kredittelýine yqpal etedi», - dedi Espaeva Májilistiń jalpy otyrysynda.
Onyń aitýynsha, «Aq jol» fraktsiiasynyń depýtattary mikrokreditter boiynsha jyldyq tiimdi syiaqy mólsherlemesin jyldyq 56%-dan aspaityn soma men merzimge shekteýsiz belgileýdi usynǵan. Qarjy naryǵyn baqylaý men retteý agenttigi bul bastamany qoldaǵan.
Sondai-aq, Espaeva fraktsiianyń «Mikroqarjy qyzmeti týraly» Zańǵa mikrokredit boiynsha artyq tólemniń shekti mólsherin eki esege – mikrokredit somasynyń 100%-ynan 50%-yna deiin tómendetý boiynsha túzetýlerge qol jetkizgenin aitty.
Májilis depýtatynyń aitýynsha, halyqtyń qaryz tuzaǵyna túsýiniń negizgi sebebi – joǵary paiyzdar bolyp otyr, sonyń saldarynan olar óz múlkinen, sonyń ishinde jalǵyz baspanasynan aiyrylýy múmkin.
«Mikroqarjy uiymdaryndaǵy problemalyq qaryz úlesi jyl saiyn ósip keledi. 2022 jylǵy naýryzdaǵy jaǵdai boiynsha 1 212 myń qaryzdyń 435 myńy problemalyq bolǵan. Merzimi ótken qaryzdar – 479 myń qaryz alýshy nemese jartysynan astamy kollektorlyq kompaniialarǵa satyldy. Osylaisha, mikroqarjy uiymdarynyń portfelindegi problemalyq qaryzdardyń jalpy sany 914 myń nemese jartysynan astamyn quraidy. Qazir ulttyq ekonomikany nesielendirýdi qysqartý, jumys oryndary men halyq tabysynyń ósýin tejeý júrip jatyr. Jeńil bolyp kórinetin internettegi nesie berýdiń aila-amaldary da adamdardy quldyqqa itermeleýde. Bul «Jeke tulǵalardyń bankrottyǵy týraly» zańnyń qabyldanýyn qajet etti», - dedi Dániia Espaeva.
Osyǵan bailanysty «Aq jol» fraktsiiasynyń depýtattary onlain-kreditteýge tyiym salýdy usyndy.
