Jaqynda meshitterde resmi ýaǵyzdan keiin qosymsha onyń orys tilindegi túsiniktemesin berý usynylǵan bolatyn. Bul másele tóńireginde qazir qoǵamda qyzý pikirtalas júrip jatyr. Bireýler bul durys bastama dese, endi bireýler munyń qazaq tiline kesiri tiedi dep alańdaidy. Biz osy máselege orai depýtattardyń pikirin surap bildik, - dep jazady baq.kz
Májilis depýtaty Bekbolat Tileýhan máseleniń eki jaǵy bar ekenin aitady. Sondyqtan jai-japsardy jan-jaqty zerdelegen jón.
«Bul endi kelgen jamaǵatqa bailanysty. Mysaly, Soltústik Qazaqstanda jamaǵat jappai orys tildi bolyp, qutpa qazaqsha oqylyp, ony el túsinbese, qalai bolady degen oi bar. Ekinshiden, qazaqtyń uǵymynda dini-joralǵylardyń barlyǵy tek qana ultymyzǵa ǵana qatysty siiaqty. Jeke ózime onyń oryssha aitylýy qulaqqa túrpidei tiedi. Muny da túsinýge bolady. Endi aqiqat shamamen ekeýiniń arasynda dep oilaimyn», - deidi depýtat.
Nurtai Sabilianovtyń sózinshe, meshitke baratyn jamaǵattyń barshasy derlik qazaq tilindegi ýaǵyzdy túsinedi. «Al túsinbeitin azshylyqtyń tildi úirengeni jón bolar» degen pikirde depýtat.
«Bireý túsinbeidi eken» dep jatsa, onda keletin adamdar qazaqsha úirený kerek dep esepteimin. Meshitterge ózimizdiń qazaq azamattary barady. Meshitke baryp júrgen azamattardyń 98 paiyzy qazaq tilinde jaqsy túsinip, jaqsy qabyldaidy. Múmkin kei jerlerde qazaq tilindegi ýaǵyzdy túsinbeitindei jaǵdai bar shyǵar. Ony qoǵam ózi retteýi kerek. Eń bastysy, durys ýaǵyz aityp, sony jetkizý. Áitpese, qoǵamymyzda ár túrli ýaǵyz aitatyn adamdar bar. Mańyzdysy, qai tilde aitqanda emes, halyqqa jaqyn jetkize bilýde bolyp otyr. Jaqsy ýaǵyz aitatyn azamat bolsa, adamdar ony qai tilde bolsa da tyńdaidy, túsinedi», - deidi N.Sabilianov.
Májilis depýtaty Ahmet Muradov qajettilik bolǵan jaǵdaida, ýaǵyzdy oryssha da aitýǵa bolady dep esepteidi.
«Árine, kóp jamaǵat bolǵan jerde, ýaǵyz qazaqsha oqylýy kerek. Biraq túrli ult ókilderi keletin meshitter bar. Olar ýaǵyz tyńdap, túsingisi keledi. Osy adamdarǵa ýaǵyzdy oryssha túsindirip ketkende turǵan eshteńe joq dep oilaimyn. Máselen, Almatyda «Vainah» meshiti bar, onda ýaǵyz qazaqsha, oryssha jáne sheshen tilinde oqylady. Árkimge Jaratqannyń sózin jetkizýge tyrysady», - degen pikirin bildirdi ol.
Qazaqstan Jazýshylar odaǵynyń tóraǵasy, Senattyń burynǵy depýtaty Nurlan Orazalinniń paiymdaýynsha, meshitte qazaqsha ýaǵyz oqylǵan soń, qosymsha onyń orys tilinde túsiniktemesin berýdiń esh ábestigi joq.
«Oryssha sóileitin musylmandar bar ǵoi. Onyń ziiany joq dep oilaimyn. Dinde til emes, dinde uǵym, senim, nanym degen bolý kerek. Oryssha nasihattaý tiimdi bolsa, onyń eshqandai ziiany joq. Tek dinge, qoǵamǵa qarsy bolmaý kerek, ondai jaǵdaida toqtatý qajet. Qazaq eliniń tutastyǵyna qarsy bolmaýy tiis», - deidi senator.
Aita ketsek, imamdardyń ýaǵyzyn tolyq túsinbeitin dindarlar bar bolǵandyqtan, kópultty eldi mekenderdegi jekelegen meshitterde qosymsha orys tilinde túsinikteme berý usynylyp otyr. QR Din isteri jáne azamattyq qoǵam ministrliginiń ýáji boiynsha qazaqsha ýaǵyzdy túsinbegen azamattar islam týraly aqparatty resmi emes derekkózderden, onyń ishinde teris dini aǵym ustanýshylarynan alýǵa májbúr. Endi Qazaqstan musylmandary dini basqarmasy meshitke kelýshi jamaǵattyń pikirin eskere otyryp, osy másele boiynsha sheshim qabyldaityn bolady.
