Áskeri qyzmetkerler, ishki ister organdary qyzmetkerleriniń jáne depýtattardyń jalaqysy kóteriledi. Bul týraly búgin Úkimettiń selektorlyq rejimdegi otyrysynda 2017 jylǵa arnalǵan respýblikalyq biýdjetti naqtylaý týraly Zań jobasyna qatysty baiandama jasaǵan QR Qarjy ministri Baqyt Sultanov aitty, dep habarlaidy "Ult aqparat".
«Áskeri qyzmetkerler, ishki ister organdary qyzmetkerleriniń jáne depýtattardyń jalaqysyn kóterýge 33,1 mlrd teńge kózdelgen. Qol jetkizilgen ekijaqty jáne ratifikatsiialanǵan kelisimge sáikes, Qyrǵyz Respýblikasyna tehnikalyq járdem kórsetýge 14,1 mlrd teńge qarastyrylǵan», - dedi ol.
Sonymen qatar, ministr "Nazarbaev Ýniversiteti" derbes bilim berý uiymyna nysanaly salymdy ulǵaitýǵa 22,2 mlrd teńge, kórmeden keiingi is-sharalardy ótkizýge jáne EKSPO aýmaǵynda ofister daiyndaýǵa 20 mlrd teńge somasynda qarajat kózdelgenin atap ótti.
Jalpy, Sultanovtyń deregine sáikes, 2017 jylǵa arnalǵan respýblikalyq biýdjettiń naqtylanǵan túsimderi 9 691,5 mlrd teńgeni nemese JIÓ-ge 18,7 paiyz quraidy. Onyń ishinde munailyq emes túsimder josparǵa qaraǵanda 77,9 mlrd teńgege ósip, 4 497,2 mlrd teńge, munai túsimderi josparǵa qaraǵanda 14,9 mlrd teńgege tómendep, 5 194,2 mlrd teńge bolady.
«Respýblikalyq biýdjettiń shyǵystary 2017 jyly 11 191,5 mlrd teńgeni quraidy, ol naqtylanǵan jospardan 15,1 mlrd. teńgege kóp», - dedi ol.
