Búgin Májiliste qoǵam qairatkerleri jer resýrsyn utymdy paidalaný máselesine pikirlerin ortaǵa saldy. Bul týraly "Ult aqparat" Májilistiń baspasóz qyzmetine silteme jasap habarlaidy.
Óz sózinde qoǵam qairatkeri Muhtar Taijan Jer Kodeksine engizý buryn da aitylǵan birqatar usynystardy taǵy bir márte eske saldy. Naqtyraq aitsaq, aýylsharýashylyǵy jerlerin jalǵa alý institýtyn engizý, biryńǵai agrarlyq salyq, sondai-aq, jerge ǵaryshtyq monitoring jasaýdy zańdastyrý týraly atap ótti.
Sonymen birge, jer qatynastary salasyn tehnologiialyq jańǵyrtý jáne tsifrlandyrý, aýylsharýashylyǵy jerlerin jalǵa alý institýtyn jetildirý jáne retteý máseleleri talqylandy.
Májilis depýtattary men Aýyl sharýashylyǵy ministrligi ókilderi túsken usynystardyń barlyǵy nazarǵa alynatynyn aitty.
«Talqylaý barysynda qoǵamdyq belsendiler tarapynan aýylsharýashylyǵy jerlerine qatysty naqty 4 usynys tústi. Májilis jumysy árqashanda ashyq. Depýtattar usynystardyń barlyǵyn talqylaidy. Sondyqtan, búgingi dóńgelek ústel barysynda túsken pikirler de sarapqa salynady. Osy rette, bir máselege nazar aýdarǵym keledi. Jer Kodeksinde jerdi jeke menshikke ótkizýge tyiym salýdy alyp tastaýǵa nemese sheteldikterge, azamattyǵy joq tulǵalarǵa, sheteldikter qatysqan kompaniialarǵa jalǵa berýge qatysty ózgerister joq», - dedi, Májilistiń Agrarlyq máseleler komitetiniń tóraǵasy Saparhan Omarov.
«Jer, ásirese, aýylsharýashylyǵynda iri kapital, resýrs. Onsyz eshteńe óndirý múmkin emes. Eger jer tiimsiz paidalanylsa, ony sheshýdiń tetikterin qarastyrýymyz kerek. Qoǵamdyq qairatkerler usynystaryn aitty. Usynystar joǵary kásibi deńgeide daiyndalǵan. Onyń barlyǵyn tiianaqty saralap, taldap, odan keiin Úkimette zerdelep, Májiliste qaralatyn AÓK týraly zań jobasy aiasynda talqylaý qajet», - dedi Premer-Ministrdiń orynbasary, Aýyl sharýashylyǵy ministri Ómirzaq Shókeev.
